Tribuna/Авто/мото/Блоги/Гоначная псіхапатыя НЕ ВАЙНЕ!/За трэцяе як за першае. На Гран Пры Іспаніі перамог Франчэска Баньяя, але не гэта было самым цікавым

За трэцяе як за першае. На Гран Пры Іспаніі перамог Франчэска Баньяя, але не гэта было самым цікавым

Італьянец з завадской каманды Ducati здолеў нарэшце дацягнуцца да сваёй першай у гэтым сезоне MotoGP перамогі. Гэта навіна была б сенсацыяй, калі б за яго спінай не зладзілі шоў яго напарнік Джэк Мілер разам з Алешам Эспаргара і Маркам Маркесам.

За трэцяе як за першае. На Гран Пры Іспаніі перамог Франчэска Баньяя, але не гэта было самым цікавым

Фота: motogp.com

Італьянец з завадской каманды Ducati здолеў нарэшце дацягнуцца да сваёй першай у гэтым сезоне MotoGP перамогі. Гэта навіна была б сенсацыяй, калі б за яго спінай не зладзілі шоў яго напарнік Джэк Мілер разам з Алешам Эспаргара і Маркам Маркесам.

Не мотагонкамі, вядома, найперш заняты ўвесь свет ужо трэці месяц. Фашысцкая навала забівае мірных і ні ў чым не вінаватых украінцаў, руйнуе іх гарады і разбурае іх жыццё. На ўкраінскую зямлю прыйшло сапраўднае зло, якое нават адзначыла сябе новай свастыкай. Рэчаіснасцю для Украіны апынулася тое, што яшчэ зусім нядаўна не прыходзіла нават у начныя кашмары.

Толькі мужнасць і нязломнасць украінцаў спыніла агрэсара, які разявіў сваю пашчу на ўсе землі вакол. Іх натхняе зусім не прэзідэнт, хаця ў крытычны момант ён стаў сапраўдным лідарам нацыі, а простая павага да сябе і сапраўдная любоў да сваёй радзімы – усё тое, што невядомае ворагу, які ўмее толькі падпарадкоўвацца загадам.

Таму Украіне абавязкова трэба дапамагаць усім, чым магчыма. На шчасце, свет гэта разумее, і праграма лэнд-лізу развіваецца. На баку агрэсара засталіся толькі нешматлікія прадажныя еўрапейскія палітыкі, якіх, я спадзяюся, на наступных выбарах пагоняць паганымі венікамі выбаршчыкі. Украінцы ж прагоняць ворага за сваёй зямлі, каб адбудаваць усё разбуранае. Выканаць абедзве задачы ім дапамогуць і беларусы, якія зараз змагаюцца і за нашу свабоду. Слава Україні! Героям Слава! Верым! Можам! Пераможам! Жыве Беларусь!

Іспанія таксама сярод тых, хто дапамагае Украіне. А яшчэ ў яе багатыя гоначныя традыцыі, і чэмпіянат MotoGP, у якім выступае багата іспанцаў, кожны сезон завітвае туды некалькі разоў. Ён у гэтым годзе непрадказальны і напружаны, як сапраўдны трылер, але Гран Пры Іспаніі, што ў мінулы ўік-энд адбыўся на трасе імя Анхеля Ніета ў Херэсе, калі казаць шчыра, да трылера не дацягваў.

Не, сенсацыі на ім былі, і аўтарам галоўнай з іх стаў Франчэска Баньяя. У італьянца нарэшце стала ўсё атрымлівацца: ён ехаў стабільна хутка, не памыляўся, не падаў, а ў суботу выйграў поўл, першы ў гэтым сезоне. І хоць кожны раз я адзначаю, што першая стартавыя пазіцыі маюць ў мотагонках невялікае значэнне, гэтым разам многае вырашылі менавіта яны.

Тым і можна было б скончыць, бо на старце гонкі Пэка захаваў лідарства і ўтрымаў яго да самага фінішу. Так, дзейсны чэмпіён Фабіа Куартарара з Monster Energy Yamaha MotoGP увесь час быў блізка і толькі і чакаў памылкі італьянца з Ducati Lenovo Team. А памыляўся ён, у тым ліку лідзіруючы ў гонках, у мінулым неаднаразова.

Аднак гэтым разам у Баньяі атрымалася ўсё, і ён папоўніў сваю скарбонку 25 пераможнымі ачкамі. Куартарара ж цалкам задаволіўся і другім месцам. Другім Эль Д’ябла і стартаваў, а гоншчык Aprilia Racing Алеш Эспаргара стартаваў і фінішаваў трэцім. Карацей, чым заўгодна, але не трылерам была ўчарашняя гонка прэм’ер-катэгорыі MotoGP. Хоць вось якраз за трэцяе месца барацьба ішла шчыльная і прынцыповая.

Алеша спачатку адцерлі назад шасціразовы чэмпіён Марк Маркес з завадской каманды Repsol Honda Team і напарнік Баньяі Джэк Мілер. Менавіта на карысць аўстралійца сітуацыя доўгі час і складалася, хаця траса ў Херэсе не самая хуткая ( баліды MotoGP на ёй не перавышаюць нават 300 км/г), і магутнасць рухавікоў Desmcosedici GP22 асаблівай перавагі не дае. Праўда, і Маркес, які быў самым хуткім на першых кругах, пазней ужо не мог выкарыстаць увесь патэнцыял шасі сваёй Honda RC213V.

Так яны і ішлі блізка адзін ад аднаго, пакуль за пяць кругоў да фінішу іспанец не прасунуўся наперад у пятым павароце. Але ў апошнім павароце Марк памыліўся, праехаў шырока, уратаваўшыся ад падзення толькі сваім фірменным «сэйвам». Толькі Эспаргара ў гэты момант усё роўна абагнаў і Мілера, і яго, а ўжо на галоўнай прамой на тармажэнні перад першым паваротам Маркеса абагнаў і Джэк. Іспанец, зрэшты, не здаўся, і на апошнім кругу ўсё ж адабраў у аўстралійца чацвёртае месца.

Глабальна ж гонка ў Херэсе нічога не змяніла, хіба што Баньяя ў чэмпіянаце падняўся на пятую пазіцыю, апярэдзіўшы Хоана Міра з Team Suzuki Ecstar, які ўчора фінішаваў шостым. У іх роўная колькасць балаў, па 56. Для напарніка Міра Алекса Рынса іспанскі этап склаўся дрэнна, стартаваўшы чатырнаццатым, фінішаваў ён увогуле дзевятнаццатым, у асабістым заліку апусціўшыся на чацвёртую пазіцыю. І ён цяпер мае тыя ж 69 балаў, што і Энеа Басціаніні з Gresini Racing MotoGP.

Пакуль што адзіны ў гэтым сезоне двухразовы пераможца ў Херэсе скончыў гонку восьмым, затое ў чэмпіянаце падняўся на трэцюю пазіцыю. Эспаргара ў сваю чаргу падняўся на другую, і мае 82 ачкі. Ну а Куартарара, у адрозненні ад Басціаніні, хоць і мае ў сваім актыве пакуль што толькі адну перамогу, стаў першым, хто хоць неяк замацаваў сваё лідарства ў асабістым заліку – у яго 89 балаў. Зрэшты, адрыў ад Алеша ўсё роўна нязначны.

Team Suzuki Ecstar са 125 ачкамі працягвае лідзіраваць сярод каманд. Aprilia Racing захавала другую пазіцыю і мае 109 ачкоў, на два апярэджваючы Monster Energy Yamaha MotoGP, якая засталася другой.

Сезон MotoGP праз два тыдні працягне Гран Пры Францыі, які пройдзе на трасе ў Ле Мане.

Другие посты блога

Все посты