Гоначная псіхапатыя НЕ ВАЙНЕ!
Блог

Фінал бліжэй, інтрыга слабей. Этапы Формулы Е ў Лондане не зрабілі чэмпіянат цікавейшым

Фота: Formula E

У гэтым сезон электрычнай Формулы мы прывыклі да вострай і шчыльнай барацьбы за лідарства. Але падзеі перадапошніх этапаў у Лондане ў мінулыя выхадныя склаліся так, што напярэдадні фіналу чэмпіён, здаецца, ужо вядомы.

Да чаго прывыкнуць немагчыма, дык гэта да вайны. Ад яе ўжо больш за пяць месяцаў пакутуе Украіна, і не пачынаць з гэтага кожны артыкул у мяне не атрымліваецца. Вайна – гэта ненатуральны стан, хвароба. Руйнаванне гарадоў і забойствы іх жыхароў – гэта злачынства.

Закамплексаваны расійскі дыктатар канчаткова звар’яцеў, і збіраецца спаліць у вогнішчы ўвесь свет, бо не можа дазволіць яму існаваць, пасля свайго зыходу ў нябыт. Украіна сімвалізуе для яго свабодны і шчаслівы свет, таму знішчыць ён вырашыў найперш яе.

Толькі пачвара не ўлічыла, што знішчыць свабодны і адказны за сваю будучыню народ немагчыма. Як немагчыма і супрацьстаяць усяму свету, які ўжо зразумеў, з якой бядой сутыкнуўся, і згуртаваўся вакол Украіны.

Зрабілі гэта і сумленныя беларусы, якім сорамна за тое, што іх краіна стала саўдзельніцай злачынства і якія дапамагаюць украінцам. Іх вызваленне прынясе вызваленне і нам. Слава Україні! Героям Слава! Верым! Можам! Пераможам! Жыве Беларусь!

Хацелася б, каб перамога нашых суседзяў і сяброў была гэтак жа блізка, як і фінал сезона Формулы Е, хоць добра ўжо тое, што яна прадвызначаная. Ці добра ж тое, што амаль усё зразумела і з электрычнымі гонкамі, хай кожны вырашае для сябе.

Ці магло б пасля этапаў у Лондане ўсё быць іначай? Калі б у кваліфікацыі трынаццатага этапу, што прайшоў у суботу, пашанцавала Эдоарда Мартары з ROKiT Venturi Racing або Жану-Эрыку Верню з DS Teechetah, то так. Але швейцарац паказаў дзявяты вынік, а француз увогуле трынаццаты.

Не склалася для абодвух і гонка. Вернь у ёй фінішаваў чатырнаццатым, а Мартара – васямнаццатым і апошнім. На першым кругу ў першых паваротах ён патрапіў у замес, сутыкнуўшыся з гоншчыкам Jaguar TCS Racing Сэмам Бёрдам, і моцна пашкодзіў свой балід.

Абганяць на лонданскай трасе складана, і гонкі на ёй рэдка бываюць падзейнымі. Не ўратавала становішча нават рашэнне арганізатараў павялічыць час дзеяння рэжыму атакі да шасці хвілін. Хаця збольшага гэта было зроблена, каб хоць неяк прымусіць гоншчыкаў эканоміць энергію – яе расход у Лондане ніжэйшы, чым на іншых этапах.

Так ці інакш, застаецца толькі канстатаваць, што першая тройка на старце і на фінішы выглядала аднолькава: пілот Avalanche Andretti Джэйк Дэніс стартаваў з поўла і перамог, а Стофель Вандорн і яго напарнік па Mercedes-EQ і дзейсны чэмпіён Нік дэ Фрыс другім і трэцім адпаведна гонку і пачалі, і скончылі.

Хіба што нідэрландзец пасля фінішу свайго трэцяга месца пазбавіўся. Суддзі вырашылі, што ён занадта жорстка абараняўся ад атак з боку гоншчыка Envision Racing Ніка Кэсідзі, і навесілі яму пяць штрафных секунд. У выніку трэцім у пратаколе стаў якраз новазеландзец, а дэ Фрыс апусціўся на шостае месца.

Нядзельны этап быў крыху весялейшым. З поўлу ізноў стартаваў Дэніс, але ззаду ў яго быў ужо напарнік Мартары Лукас дзі Грасі. Бразілец увесь час трымаўся паблізу ад брытанца, нават пасля другой актывацыі рэжыму атакі. І калі на яе адправіўся сам Джэйк, Лукас выйшаў наперад і ўжо не саступіў лідарства, атрымаўшы перамогу. Дэніс задаволіўся другім месцам.

Трэцяе папросту магло б дастацца былому пілоту Alfa Romeo ў Формуле 1 Антоніа Джавінацы, які ў Формуле Е выступае за Dragon/Penske Autosport. Італьянец трэцім і кваліфікаваўся, аднак у гонцы спачатку прапусціў некалькіх супернікаў, потым атрымаў штрафны праезд па піт-лэйне за перарасход энергіі, а да фінішу ўвогуле не дабраўся праз праблемы з машынай.

Так што трэцім з другой спробы ўсё ж такі стаў дэ Фрыс. Вандорн у нядзелю фінішаваў чацвёртым, аднак у чэмпіянаце, дзякуючы ў тым ліку праблемам у пераследнікаў (Мартара заняў толькі трынаццатае месца, а Вернь сышоў з дыстанцыі пасля інцыдэнту на першых кругах), Стофель лідзіруе, маючы 185 ачкоў.

Мітчэл Эванс з Jaguar, які ў суботу фінішаваў дзясятым, а ў нядзелю не фінішаваў увогуле, падняўся на другую пазіцыю, але ад канкурэнта з Mercedes адстае моцна – у яго 149 балаў. Яму ў сваю чаргу пяць ачкоў саступае Мартара, які апусціўся на трэці радок. Mercedes-EQ з 291 ачком працягвае лідзіраваць у камандным заліку. Калектыў ROKiT Venturi на другой пазіцыі, у яго 255 ачкоў, DS Techeetah замыкае першую тройку і мае 244 балы.

Восьмы сезон Формулы Е завершыцца на наступных выхадных. Яго апошнія два этапы ўпершыню прыме сталіца Паўднёвай Карэі – Сеул.

Комментарии

Возможно, ваш комментарий – оскорбительный. Будьте вежливы и соблюдайте правила
  • По дате
  • Лучшие
  • Актуальные