Трибуна

Два тытулы за раз. Серыя GT World Challenge Europe вызначыла сваіх чэмпіёнаў у Валенсіі

Шарлю Віртсу і Дрысу Вантору не ўдалася абараніць тытул сярод гоншчыкаў у абсалюце серыі GT World Challenge Europe, яго аднаасобным уладальнікам цяпер з’яўляецца Рафаэле Марчэла. Затое бельгійцы сталі лепшымі ў Кубку Sprint і яскрава перамаглі ў адной з гонак у Валенсіі.

Два тытулы за раз. Серыя GT World Challenge Europe вызначыла сваіх чэмпіёнаў у Валенсіі

Фота: gt-world-challenge-europe.com

Шарлю Віртсу і Дрысу Вантору не ўдалася абараніць тытул сярод гоншчыкаў у абсалюце серыі GT World Challenge Europe, яго аднаасобным уладальнікам цяпер з’яўляецца Рафаэле Марчэла. Затое бельгійцы сталі лепшымі ў Кубку Sprint і яскрава перамаглі ў адной з гонак у Валенсіі.

Найперш трэба павіншаваць Украіну з тым, што яна вызваліла з расійска-фашысцкага палону больш за дзве сотні сваіх герояў, сярод якіх ёсць і адзін беларус. Будзем спадзявацца, што гэта толькі першая з падобных добрых навін, і хутка ўсе героі вернуцца дадому. Таксама зычым Узброеным сілам Украіны поспеху на фронце, каб акупантам весялей было праводзіць свае «рэферэндумы».

Кожны сумленны беларус зычыць украінцам хутчэйшых перамогі і вызвалення. Іх поспех дапаможа і нам, што тутэйшы калгасны дыктатар разумее. У тым ліку па гэтай прычыне ён набірае закладнікаў, каб потым выгандляваць сабе міласць. Але вінаваты ён цяпер перад двума народамі, і дараваць яму, як і яго расійскаму гаспадару, ніхто нічога не збіраецца. Слава Україні! Героям Слава! Верым! Можам! Пераможам! Жыве Беларусь!

Праз злачынствы сваёй дзяржавы расійскі гоншчык Цімур Багуслаўскі, які выступае за каманду Akkodis ASP Team у серыі GT World Challenge Europe, вымушаны рабіць гэта пад нейтральным сцягам. Хаця і расійскі наўрад ці дапамог бы яму і яго калегу па восемдзесят дзявятым экіпажы Рафаэле Марчэла на этапе ў Валенсіі ў мінулы ўік-энд.

Суботняя кваліфікацыя для Багуслаўскага не задалася, і стартавалі яны з Марчэла толькі дзевятнаццатымі. Аднак у гонцы здолелі прарвацца на сёмае месца, тады як Шарль Віртс і Дрыс Вантор адносна старту адну пазіцыю згубілі. Бельгійцы з трыццаць другога экіпажа Team WRT пачыналі гонку другімі, але іх канкурэнты з адзінаццатага экіпажа Tresor by Car Collection Сімон Гашэ і Крыстафер Хаасэ, якія стартавалі трэцімі, дзякуючы болей ранняму і вельмі хуткаму піт-стопу здолелі выйсці наперад і занялі другое месца.

Ну а перамаглі, пралідзіраваўшы ад старту да фінішу, уладальнікі поўлу – пяцьдзесят трэці экіпаж AF Corse у складзе Уліса дэ Паў і П’ера Александра Жана. Прадстаўнікам заліку Silver Cup не перашкодзіла ні нейтралізацыя гонкі праз аварыю пяцьдзесят чацвёртага Porsche 911 GT3-R каманды Dinamic Motorsport, ні канкурэнты. Хаця Audi R8 LMS Evo II GT3 Гашэ і Хаасэ на апошніх кругах быў блізка ад іх Ferrari 488 GT3, і перамаглі яны з перавагай усяго ў 0,587 секунды.

Паўтарыць дасягненне ў нядзелю ў дэ Паў і Жана не атрымалася – у кваліфікацыі яны паказалі толькі восьмы вынік. Поўл жа выйграў Марчэла, аднак надворныя ўмовы ў гонцы адрозніваліся – яна пачыналася на мокрай пасля дажджу трасе, і менавіта гэты фактар абумовіў яе ход.

Віртс з Ванторам, якім і трэцяга месца ў суботу хапіла для перамогі ў Кубку  Sprint, стартавалі ізноў другімі, і доўгі час пра перамогу нават не падумвалі. Насупраць, Вантор на першым кругу страціў пару пазіцый, прапусціўшы ў тым ліку канкурэнта з дваццаць пятага экіпажа Sainteloc Junior Team Патрыка Нідэрхаўзэра, які выступае разам з Арэльенам Панісам.

Хутка Дрыс, праўда, вярнуўся ў першую тройку, але атакаваць Нідэрхаўзэра магчымым не прадстаўлялася. А Марчэла, які на сваім Mercedes-AMG GT3, дык тым больш – швейцарац быў хуткім на сваім адрэзку, і калі перадаў стырно Багуслаўскаму, той таксама вярнуўся лідарам, а яго адрыў ад ужо Паніса складаў 25 секунд.

Аднак менавіта піт-стопы ўсё і вырашылі. Траса падсыхала, што паставіла каманды перад няпростым выбарам – застацца на дажджавых шынах або перайсці на слікі. У Akkodis ASP Team і ў Sainteloc Junior Team вырашылі не рызыкаваць, і засталіся на дажджавых, а вось у Team WRT на трыццаць другую машыну паставілі якраз слікі.

Гэтае рашэнне многім спачатку падалося дзіўным, бо хуткасці гэта Audi Вантора і Віртса не прыбавіла. Шарль спачатку толькі губляў пазіцыі, адкаціўшыся ў пэўны момант на шостую. Аднак за дзесяць хвілін да сканчэння часу гонкі слікі запрацавалі, ды так, што Віртс быў самым хуткім на трасе, што дазволіла яму аператыўна вярнуцца ў першую тройку ізноў.

Другім па хуткасці быў Паніс, які ў сваю чаргу хутка скарачаў адставанне ад Багуслаўскага, хаця шыны ў іх былі аднолькавыя. І на апошніх хвілінах паміж французам і расіянінам развярнулася вельмі напружаная дуэль, якая на апошнім кругу быць дуэллю перастала. Віртс аднаго за адным абагнаў спачатку Паніса, а потым і Багуслаўскага, і атрымаў перамогу. Цімур жа не стрымаў і Арэльена, задаволіўшыся з Марчэла трэцім месцам.

Зрэшты, Рафаэле яшчэ па выніках кваліфікацыі стаў чэмпіёнам серыі GT World Challenge Europe сярод гоншчыкаў. Па выніках жа ўсяго этапу ў Валенсіі ў яго стала 190,5 ачка. Вантор і Віртс, у якіх 162,5 ачка, на другой пазіцыі, Жуль Гунон са 120,5 бала замыкае першую тройку. Akkodis ASP Team лідзіруюць у камандным заліку, маючы 223,5 ачка, Team WRT з 207,5 ачка на другой пазіцыі, Tresor by Car Collection, у якіх 101,5 бала, на трэцяй.

Наступны этап серыі GT World Challenge Europe стане фінальным у гэтым сезоне. Ён пройдзе ў фармаце Endurance 30 верасня – 2 кастрычніка таксама ў Іспаніі, але ўжо ў Барселоне. Ужо апублікаваны і каляндар на 2023 год. Самым значным адрозненнем у параўнанні з гэтым сезонам стаў перанос гонкі 24 гадзіны Спа-Франкаршам з канца ліпеня на пачатак. Будзем спадзявацца, на яе відовішчнасць гэта паўплывае найлепшым чынам.

Другие посты блога