Лепшы цмок. 5 малавядомых фактаў пра MVP сакавіка ў Лізе ВТБ

Эфектыўная гульня на працягу ўсяго сезону, а таксама статус аднаго з лідараў «Цмокаў», нарэшце, знайшлі адабрэнне – форвард «драконаў» Іван Мараш быў прызнаны заўзятарамі MVP сакавіка ў Адзінай лізе ВТБ. У заслужанасці ўзнагароды сумнявацца не даводзіцца: у пяці сустрэчах першага вясновага месяца балканец набіраў па 18,8 ачкоў, 8,8 падбораў і 2,8 перадачы ў сярэднім за сустрэчу, рэалізоўваючы 59,5% дзвухачковых і 43,5% далёкіх спробаў. Мы ж у сваю чаргу ўзгадваем пяць цікавых фактаў, звязаных з чарнагорцам.

АЖЫЦЦЯВІЎ МАРУ У 16 ГАДОЎ

Для ўраджэнца Чарнагорыі, які любіць баскетбол, гульня за тамтэйшую «Будучнасць» настолькі ж прэстыжная, як для каталонца – падпісанне кантракту з «Барселонай», а для жыхара Вісконсіна – выйгрыш Суперкубка у складзе «Грын Бэй Пэйкерс». Карацей, мяжа мараў. У гэтым плане казка Мараша спраўдзілася да не прыстойнасці рана – ужо ў 16 гадоў ён правёў першы паядынак у складзе дарослай каманды, стаўшы тым самым рэкардсменам дружыны. Бо да яго ніхто не дэбютаваў у складзе мясцовага флагмана ў такім юным узросце. Дарэчы, Іван выступаў у клубе на працягу сямі гадоў.

ПЕРАМАГАЎ БЕЛАРУСКУЮ «МАЛАДЗЁЖКУ»

У 2006-м Мараш наўрад ці мог выказаць здагадку, што ў будучыні прымерыць форму мінскага калектыву. Аднак менавіта тады форвард пазнаёміўся з Беларуссю. Здарылася гэта на маладзёжным чэмпіянаце Еўропы, у якім Сербія і Чарнагорыя адолела Парахоўскага і кампанію з лікам 81:57. На тым першынстве балканцы заваявалі залатыя медалі, а сам Іван адыграў немалую ролю ў поспеху зборнай. У прыватнасці, набіраў па 9,3 ачкоў і 3,9 падборы за сустрэчу, рэалізоўваючы палову спроб з гульні. Няблага, улічваючы, што ён дзяліў гульнявы час з такімі каларытнымі персанажамі, як Тэпіч, Вялічкавіч і, вядома, Нікола Пекавіч, які цяпер выступае ў НБА.

СТАНАВІЎСЯ MVP ЧЭМПІЯНАТУ БАХРЭЙНА

Вікторыя ў «маладзёжцы» – далёка не адзіны трыумф ў кар’еры Мараша. У мінулым сезоне, напрыклад, ён заваяваў золата чэмпіянату Бахрэйна. Пры гэтым унікальнасць форварда (еўрапейцаў яго фактуры ў тамтэйшым першынстве днём з агнём не адшукаеш) не перашкодзіла заваяваць індывідуальную ўзнагароду – чарнагорац быў прызнаны MVP сезона.

ПРАЦАГОЛІК

Поспехі ж Мараша зусім не выпадковыя. Як-ніяк адзін з лідараў «Цмокаў» ідэальна ўпісваецца ў формулу: відавочны талент – нішто без карпатлівай працы. І справа не толькі ў стараннасці форварда, якую ён праяўляе на трэніроўках, але і ў стаўленні да адпачынку. Па сутнасці, для Івана адпачынак паміж сезонамі не доўжыцца больш за два тыдні. Пасля чаго балканец зноў працуе над фізічнымі кандыцыямі і кідком. Станоўчы жа эфект ад такога стаўлення бачны і ў цяперашнім першынстве: мала таго, што Мараш бегае па пляцоўцы практычна без замен, так і атакуе з дзіўнай для гульца яго амплуа эфектыўнасцю.

УЛАДАЛЬНІК ДОБРАГА ГУСТУ

Зрэшты, маніякальная адданасць любімай справе не перашкаджае ўсебаковаму развіццю гульца. У прыватнасці, MVP сакавіка лігі ВТБ любіць добрыя фільмы, а яго любімай кінакарцінай з’яўляецца «Хросны Бацька» Фрэнсіса Форда Копалы.

А мы нагадваем, што ўжо 5 красавіка на Мінск- Арэне адбудзецца сустрэча паміж камандамі «Цмокі-Мінск» і «Астана».

Комплексны квіток на ўсе хатнія матчы красавіка, уключаючы гульню з грандам еўрапейскага баскетбола маскоўскім ЦСКА, можна набыць толькі ў аператараў ticketpro.by і kvitki.by.

Працягнем хатнюю серыю перамог разам!