Праўладныя спартсмены скаціліся да кампаніі Азаронка і Тура – вось так Лукашэнка і яго світа ўскладалі кветкі да манумента Перамогі
У першую палову дня 9 мая ў цэнтры Мінска было не праехаць ні аўтамабіляў, ні грамадскаму транспарту. Справа ў тым, што Лукашэнка разам са сваёй світай ўскладаў кветкі да манумента Перамогі. З-за гэтага вадзіцелям прыйшлося шукаць аб’язныя шляхі. Таксама ў гэты час не працавала станцыя метро «Плошча Перамогі».
Па традыцыі на зачышчанай ад старонніх людзей плошчы першым з’явіўся экс-кіраўнік НАК разам з сынамі.
За сямействам Лукашэнкі прайшлі дэпутаты і рэлігійныя дзеячы. На ўскладанні кветак разам з палітыкам прысутнічалі некалькі людзей з белспорту. Футбаліст Аляксандр Глеб і паралімпіец Аляксей Талай.
Таксама ў мерапрыемстве паўдзельнічала лёгкаатлетка Настасся Мірончык-Іванова і нават прачытала верш у адрас ветэранаў, паабяцаўшы «захаваць мір» (прыкладна такой па сэнсе была ўся прамова Лукашэнкі, толькі не ў вершах).
Праўда, ёсць некаторыя пытанні да абранага спартсменкай убрання: мы не эксперты ў модзе, але, здаецца, сукенка такой даўжыні не асоба падыходзіць для такога роду святаў.
Прычым варта адзначыць, што побач з Глебам і Мірончык-Івановай падчас ускладання кветак знаходзіліся галоўныя прапагандысты дзяржТБ Ігар Тур і Рыгор Азаронак.
Напрыканцы спартсмены і прапагандысты зрабілі сумеснае фота. Здаецца, Глебу такая ідэя прыйшлася не па душы.
9 мая святкуюць і іншыя праўладныя спартсмены. Дынара Алімбекава на мерапрыемстве ля манумента Перамогі заўважана не была, але выклала віншаванне з кургана Славы.
Алімпійскі чэмпіён Аляксандр Багдановіч апублікаваў фатаграфію з выглядам на педагагічны ўніверсітэт.
А гімнастка, алімпійская прызёрка-2012 Любоў Чаркашына размясціла сторыс з чырвона-зялёнай стужачкай.
Фота: БелТА
Скрын: «Беларусь 1»
