Ціманоўская пра вылучэнне ў каардынацыйную раду: «Вырашыла ўступіць у каманду Азарава, бо чалавек працягнуў мне руку дапамогі»

Беларуская лёгкаатлетка Крысціна Ціманоўская, якая выступае за Польшчу, у размове з журналістам «Зеркала» распавяла, чаму вылучаецца ў каардынацыйную раду.

– Чаму вы наважыліся балатавацца ў КС?

– Наважылася, бо хачу свабоды і незалежнасці для сваёй краіны. Хачу, як і многія беларусы, мець магчымасць наведваць сваякоў. І проста хачу, каб мая краіна развівалася.

– Калі вас выберуць у Раду, то як плануеце сумяшчаць палітыку са спортам?

– Ніякіх ахвяр не будзе. Я з тых людзей, хто ўмее сумяшчаць некалькі праектаў, калі бачу ў гэтага будучыню і ўжо тым больш калі разумею, што магу чымсьці дапамагчы навакольным.

– Вы ўваходзіце ў спіс «Закон і правапарадак», які ўзначальвае кіраўнік BYPOL Аляксандр Азараў. Як вы з ім пазнаёміліся?

– На адным з мерапрыемстваў. Знаходзілася ў цяжкім становішчы пасля разводу, і Аляксандр даў мне невялікую, скажам так, кансультацыю, параіў, куды можна звярнуцца, каб уладзіць маю сітуацыю. Таму я ў сваю чаргу вырашыла ўступіць у яго каманду, так як чалавек працягнуў мне руку дапамогі.

– Чым, лічыце, можаце быць карыснымі КС?

– Думаю, што дзякуючы маёй вядомасці маю нядрэнны ўплыў у свеце спорту і палітыкі і магу быць карысная тым, што многія могуць прыслухацца да майго меркавання. Бо я такі ж выхадзец з народа.

– Агітацыя пачалася 25 красавіка і працягнецца месяц. Што ўваходзіць у вашы абавязкі? Плануеце нейкія актыўнасці?

– Імкнуся ўдзельнічаць ва ўсім, што абмяркоўваецца ў агульным чаце цяпер я трэніруюся ў ЗША ў сувязі з надыходзячым удзелам у чэмпіянаце свету, таму на мяне пакуль не ўскладаюць вялікай адказнасці, каб магла падрыхтавацца да свайго старту і годна прадставіць зборную, – сказала Ціманоўская.