Ігар Крывушэнка: «Ганчарэнка ў БАТЭ нешта пераймаў у мяне, але ён самадастатковы трэнер, спазнае ўсё новае і новае»
Галоўны трэнер БАТЭ Ігар Крывушэнка распавёў пра тое, як праца ў барысаўскім клубе ўплывае на прагрэс трэнераў.
– Астатнюю частку кар'еры можна абʼяднаць загалоўкам «ад БАТЭ да БАТЭ». Як апынуліся ў барысаўскім клубе?
– Каманду ўзначальваў Юрый Пунтус, з якім мы знаёмыя вельмі даўно. Іосіфавіч старэйшы за мяне, але мы выхаванцы аднаго трэнера – Міхаіла Міхайлавіча Мустыгіна. У юнацтве, бывала, удзельнічаў у трэніроўках са старэйшымі хлопцамі. Там і пазнаёміліся. А потым ужо перасекліся ў мінскім «Спадарожніку». Жыццё нас звяло, і мы сябруем дагэтуль. А тады, у канцы 90-х, Пунтус паклікаў мяне на сустрэчу. Пагутарыў з ім і Анатолем Капскім. Мне даверылі працу з моладдзю ў фарм-клубе – «Змене» – БАТЭ.
– Дарэчы, толькі тры беларускія спецыялісты больш за адзін раз прызнаваліся лепшымі трэнерамі краіны: Пунтус, Крывушэнка і Ганчарэнка. Ва ўсіх агульнае гняздо – БАТЭ. Ці выпадкова гэта?
– Наадварот, гэта заканамерны вынік. Мы працавалі бок аб бок з Капскім, а ў Анатольевіча заўсёды было жаданне, каб у БАТЭ гулялі лепшыя футбалісты і працавалі лепшыя трэнеры. Не шкадуючы ўласных сіл і сродкаў, ён ствараў для гэтага неабходныя ўмовы. У адказ гульцы і трэнеры імкнуліся адпавядаць высокім патрабаванням свайго кіраўніка. Ну і, вядома, хто і што ні казаў бы, пераемнасць у БАТЭ была заўсёды. Я пераймаў нешта ў Юрыя Іосіфавіча, Віктар Міхайлавіч – у мяне. Мы былі маладымі трэнерамі, і ў кожнага з нас прысутнічаў дасведчаны настаўнік і старэйшы таварыш, на якога раўняліся.
– Ужо шмат гадоў у Расеі статус беларускага трэнера нумар адзін замацаваны за Віктарам Ганчарэнкам. А вы ніколі не задумваліся, што вольна ці мімаволі паспрыялі штуршку для яго бурнага прагрэсу як спецыяліста?
– Ужо шмат разоў казаў, што Віктар Міхайлавіч – самадастатковы трэнер. У яго ёсць адметная рыса – ён ніколі не стаіць на месцы. Вучыцца, спазнае ўсё новае і новае. Толькі з боку можа здавацца, што футбол – кансерватыўны від спорту. На самай справе ён перманентна развіваецца. А таму, калі хочаш быць паспяховым заўсёды, нельга спыняцца. Трэба ўважліва сачыць за тэндэнцыямі сучаснага футбола, не баяцца эксперыментаваць і ўкараняць у працы новыя ідэі. Віктар Міхайлавіч усім гэтым патрабаванням адпавядае, і таму нядзіўна, што ўжо столькі гадоў ён навідавоку ва ўсіх і валодае рэпутацыяй вельмі кваліфікаванага трэнера, – сказаў Крывушэнка.
