Рэдактар Marca Лара: «Не лічу справядлівым, што на атлетаў з Беларусі і Расіі накладзеныя санкцыі. Якое яны маюць дачыненне да Пуціна?»

Рэдактар Marca Мігель Анхель Лара ў інтэрв'ю парталу «Люстэрка» падзяліўся меркаваннем аб рабоце еўрапейскіх спецыялістаў у аўтарытарных краінах.

Нагадаем, што шматлiкія беларускія каманды і спартсмены былі адхіленыя ад міжнародных спаборніцтваў у адказ на вайну, якая з 24 лютага 2022 года працягваецца Расiяй ва Украіне з выкарыстаннем тэрыторыі Беларусі.

– Як вы ставіцеся да самога факту працы Карласа Алоса ў Беларусі, дзе больш за тысячу палітычных зняволеных і фактычна ўсталявалася дыктатура? Акрамя Карласа, нашу зборную па пляжным футболе трэніруе Нікалас Альварада, які пражыў амаль усё жыццё ў Іспаніі, а да вайны ва Украіне запрашаў іспанцаў і гандбольны клуб з Брэста.

– Вельмі цяжкае пытанне. Шчыра кажучы, не лічу справядлівым, што, напрыклад, сёння на атлетаў з Беларусі і Расіі накладзены санкцыі і яны не могуць спаборнічаць з найлепшымі. Якое яны маюць дачыненне да Пуціна, які развязаў вайну?

Думаю, няма сэнсу караць спартоўцаў, бо мы часта чуем, што спорт – спосаб адзінства і закліканы быць мастом. Да таго ж, калі адхілілі беларусаў і расіян, то давайце быць паслядоўнымі і не дапускаць атлетаў з іншых краін, якія вядуць войны. Такіх гісторый і ў мінулым, і сучаснасці поўна.

Некаторыя едуць працаваць у Кітай, іншыя рэкламуюць з пазітыўнага боку Катар ці Саудаўскую Аравію, хаця ўсе яны таксама перыядычна крытыкуюцца заходнімі краінамі. Што ж, у рэшце рэшт у жыцці даводзіцца рабіць маральны выбар. Калі вам прапанавалі пэўныя ўмовы, тое здаецца цалкам нармальным, што прафесіянал можа працаваць у любым месцы. Але гэта не значыць, што вы згодны з усімі рэчамі ў той ці іншай краіне, – сказаў Лара.