Дзень дурня. Навіны бундэслігі за 1 красавіка
«Аўгсбург» без еўракубкаў, шэйхі ў «Барусіі» і іншае ў кароткім аглядзе сур’ёзных і не вельмі навін.
Дортмунд блізкі да пагаднення з групай арабскіх бізнэсмэнаў
Ад прадстаўнікоў “Баварыі” стала вядома, што “Барусія” гатовая прадаць 49% сваіх акцыі групе бізнэсмэнаў з Арабскіх Эміратаў. Гаворка ідзе пра пагадненне на сотні мільёнаў еўра.
– У сувязі з велізарнымі фінансавымі магчымасцямі “Баварыі”, каб заставацца канкурэнтаздольнымі, мы вымушаны шукаць новыя мадэлі валодання клубам. Тое самае і з бундэслігай, турнір будзе заставацца прывабным, толькі калі канкурэнты не будуць адставаць ад “Баварыі”, – заявіў прадстаўнік Дортумунда.
Таксама ў сетку трапіла відэа інтэрв’ю аднаго з шэйхаў з якога вядома, што ў планах перанос Вештфален-штадзіўма цалкам у Дубаі.
“Кёльн” назаве свой стадыён у гонар Лукаса Падольскі
Па інфармацыі sportbuzzer.de з наступнага сезона, прынамсі на адзін год, стадыён “Кёльна” будзе называцца Lukas-Podolski-Stadion.
Лукас правёў за кёльнскі клуб 169 матчаў, у якіх забіў 79 галоў. І хаця апошнім часам Падольскі выступае за мяжой, яго часта можна пабачыць на дамашніх матчах казлоў.
“Аўгсбург” адмовіцца ад ўдзела ў еўракубках
Пасля 26 тураў “Аўгсбург” ідзе на шостым месцы, якое дае магчымасць удзелу ў Лізе Еўропы. Але ў заяве апублікаванай на афіцыйным сайце клубу гаворыцца аб тым, што клуб у любым выпадку не будзе выступаць у еўракубках.
Прэзідэнт клуба Клаўс Хофман патлумачыў што на тое ёсць як спартыўныя так і эканамічныя прычыны і падкрэсліў што галоўная мэта “Аўгсбурга” – замацавацца ў бундэслізе і толькі потым ставіць нейкія больш сур’ёзныя. Спартыўны дырэктар Штэфан Ройтэр дадаў, што ёсць шмат прыкладаў таго як клубы правальвалі выступленне ў бундэслізе з-за ўдзелу ў еўракубках.
Капітан Паўл Верхаг: “Усе размовы пра месца ў Лізе Еўропы ці нават Лізе Чэмпіёнаў, толькі раздражняюць футбалістаў. У першую чаргу мы павінны спытаць сябе чаму мы ўвогуле павінны кваліфікавацца ў еўракубкі, у Еўропе нас ніхто не ведае”.
Дэві Зельке пераходзіць у РБ Ляйпцыг
Апошняя навіна крыху іншага тыпу. Шматабяцаючы талент “Вэрдэра” і ўсялякіх U-зборных Германіі наступны сезон пачне ў амбіцыйным клубе з Ляйпцыгу, хутчэй за ўсё ў другой бундэслізе. Брэменскі клуб атрымае кампенсацыю памерам каля 6 мільёнаў еўра. Афіцыйны сайт “Вэрдэра” заяўляе, што гэта той тып трансфера, ад якога выйграюць ўсе бакі.
Гэта верагодна толькі пачатак актыўнай трансфернай палітыкі клуба з усходняй Германіі, далей будзе болей, і разам з трансферамі будзе расці колькасць фанатскіх пратэстаў супраць грошай аўстрыйскага канцэрну.