Хадасевіч пра ўдзел Пуцілы ў камісіі па допуску футбалістаў з «чорнага спісу»: «Немагчыма, каб дзейны футбаліст удзельнічаў у якіх-небудзь камісіях. Роўна як і камісія гэтая немагчымая»
Журналіст Мікалай Хадасевіч выказаўся пра ўдзел паўабаронцы мінскага «Дынама» Антона Пуціла ў камісіі па разглядзе допуску футбалістаў з «чорнага спісу».
[У складзе мінскага «Дынама» на матчы з «Іслаччу» (3:0)] не было Антона Пуцілы. Напэўна, ён займаецца якраз разборам гэтых 50 футбалістаў, якія трапілі ў спіс, і спрабуе зразумець: каму там можна дазволіць гуляць, а каму не.
Я буду казаць пра гэта. Бо гэта немагчыма, каб дзейны футбаліст удзельнічаў у якіх-небудзь камісіях. Роўна як і камісія гэтая немагчымая. Якая павінна вырашаць, можна камусьці гуляць ці не, – сказаў Хадасевіч.
Нагадаем, у снежні 2022-га «Трыбуна» паведамляла аб стварэнні «чорнага спісу» так званага Мінспорту як мінімум з 48 прозвішчаў, у асноўным з удзельнікаў відэа супраць гвалту ў верасні 2020-га. З фігурантамі спісу клубам у рэжыме Беларусі было забаронена заключаць кантракты.
Пазней стала вядома, што «Мінспорту» робіць выбарачныя выключэнні з пераліку, на што могуць паўплываць прашэнні кіраўнікоў клубаў і ўдзел у рэжымных мерапрыемствах, аднак некаторым гульцам не дапамагае і гэта.
