Зубовіч пра легіянерскі досвед: «У Малайзіі англійскую падвучыў, мір паглядзеў, у Казахстане быў цяжкі год – наступіў лакдаўн»
Нападаючы «Нёмана» Ягор Зубовіч распавёў пра свой легіянерскі досвед у Малайзіі.
Адзначым, што ў 2018 годзе форвард гуляў за «Мелаку», у складзе якой за шэсць месяцаў найграў 21 матч, вызначыўся 12 разоў і стаў чацвёртым снайперам чэмпіянату Малайзіі.
Таксама ў 2020-м беларус перайшоў у «Жэтысу» да лютага 2021-га.
– На майго агента выйшаў клуб. У яго там былі нейкія сувязі і яму паступіла прапанова ад партугальскага трэнера, які там працаваў. Ён убачыў нарэзкі маёй гульні і запрасіў у «Мелаку». Таксама на той момант былі запрашэнні з Казахстана, але я параіўся з жонкай, і мы разам вырашылі паспрабаваць экзатычную краіну.
Мне там вельмі спадабалася. На футбол заўсёды хадзіла шмат балельшчыкаў. Матчы былі цікавымі. Самі малазійцы больш крайнія паўабаронцы і абаронцы, а цэнтральныя зоны займаюць легіянеры – гэта апорнікі і нападаючыя. Мясцовыя вельмі хуткія і тэхнічныя. Англійскую там падвучыў, свет паглядзеў.
– Таксама вы пагулялі ў Казахстане.
– Гэта быў цяжкі для мяне год, таму што тады наступіў лакдаўн з-за каранціну. Сям'я павінна была прыехаць да мяне праз тры тыдні пасля старту чэмпіянату, але ўсё закрылі. Мы тры месяцы ўвогуле не выходзілі з гасцініцы. Паўгода дадому не мог патрапіць. Псіхалагічна гэта быў цяжкі год. Ды і гуляў там мала, – сказаў Зубовіч.