Прадстаўлена афіцыйная песня Еўра-2024
Італьянцы з Meduza, амерыканскі поп-рок гурт OneRepublic і нямецкая спявачка Leony выканаюць афіцыйную песню фінальнай стадыі Еўра-2024.
Назва афіцыйнай песні чэмпіянату Еўропы – Fire.
Песня стане галоўнай кампазіцыяй фінальнай стадыі. Яе будуць выкарыстоўваць пры выхадзе каманд на поле і ў тэлевізійных застаўках.
Удзельнікі італьянскага праекта Meduza, якія намінаваліся на «Грэмі» ў 2019 годзе, адзначылі: «Стварыць мелодыю, якая будзе ўвасабляць запал Еўра-2024 і стане гімнам для футбольных заўзятараў, – вялікі гонар».
Раян Тэдэр з групы OneRepublic, уладальнікаў трох узнагарод «Грэмі», дадаў: «У дзяцінстве я з пяці гадоў гуляў у футбол і амерыканскі футбол. Выступ на цырымоніі закрыцця ў Берліне – вялікі гонар для любога выканаўцы, і я шчыра цаню гэтую магчымасць. Энергія футбола ні з чым не параўнаецца. З нецярпеннем чакаем гэтага шанцу».
Чэмпіянат Еўропы па футболе пройдзе з 14 чэрвеня да 14 ліпеня 2024 года.
