На свой юбілей Навіцкі не захацеў успамінаць, чаму сышоў з ТБ. Расказваем, як там была справа
Хацеў каментаваць яшчэ, але кіраўніцтва кіраўніцтва канала не было зацікаўленае.
8 траўня беларускі каментатар Уладзімір Навіцкі адзначыў 70-годдзе. З гэтай нагоды ў прапагандысцкім інфармагенцтве БелТА выйшла яго інтэрвʼю. Сярод іншага прагучала пытанне пра сыход з тэлебачання. Каментатар коратка сказаў, што «прычын было некалькі, але ўспамінаць пра іх цяпер мне не хочацца».
А што адбылося? Вось што нам вядома пра тую гісторыю.
У каментатарскую справу спецыяліст прыйшоў яшчэ ў 1981 годзе і прысвяціў ёй 38 гадоў. Прычым увесь гэты час адпрацаваў у адной структуры, якая сёння называецца «Белтэлерадыёкампаніяй». Але ў лістападзе 2019 года Навіцкі, якому на той момант было 65, па ўласным жаданні пакінуў «Беларусь 5» у сувязі з выхадам на пенсію.
Праўда, усё роўна застаўся ў прафесіі. Каментаваў прапагандысцкія мерапрыемствы з удзелам Аляксандра Лукашэнкі (напрыклад, «Мінскую лыжню» ў Раўбічах), працаваў на «Снежнай снайперы» (біятлоннае мерапрыемства, якое ладзіць спартклуб Дзмітрыя Лукашэнкі). Суправаджаў хакейны «Калядны турнір». Таксама знаёмы голас чулі на матчах па пляжным футболе (Навіцкі да гэтага часу зʼяўляецца сябрам выканкама ў гэтым відзе спорту).
Аднак у каментатарскую кабінку спецыяліст так і не вярнуўся. Хаця, як аказалася, хацеў – не дазволілі пэўныя абставіны.
Незадоўга да сыходу з тэлебачання ў Навіцкага ўзніклі сурʼёзныя праблемы са здароўем. Якія менавіта, ён не распаўсюджваўся, аднак, паводле звестак нашых крыніц, каментатар нават клаўся на аперацыю. «Ён быў зусім слабы», – успамінае адзін з суразмоўцаў. Нейкі час Навіцкі заставаўся ў штаце, але знаходзіўся на бальнічным і не зʼяўляўся ў эфіры. У траўні 2019-га, з нагоды папярэдняга юбілею, каментатар казаў, што не хоча чуць пра зорную хваробу, зрэшты, «як і пра любую іншую хваробу». На той момант, наколькі нам вядома, ён яшчэ не паправіўся канчаткова. Наогул, каля года Навіцкі не мог працаваць у звыклым рэжыме.
Больш-менш аднавіўшыся, ён паспрабаваў вярнуцца да каментавання (тым больш па-ранейшаму знаходзіўся ў штаце спартыўнага канала). Але нечакана для сябе сутыкнуўся з супрацівам з боку кіраўніцтва. Як кажуць нашыя крыніцы, ніякага канфлікту не было, але босы «Беларусь 5» пасля года адсутнасці ў эфіры Навіцкага не былі зацікаўленыя ў далейшай супрацы. На гэта ўплывалі і крытыка ў адрас «мэтра» ў сацсетках праз частыя памылкі, і асцярогі, што той захоча мець ранейшы ўплыў (як распавядаюць крыніцы, Навіцкі на спартыўным канале быў «шэрым кардыналам» і часцяком ад яго залежала размеркаванне матчаў і іншай працы). Таксама каментатар хацеў захаваць на ранейшым узроўні заробак – па нашых звестках, у раёне тысячы долараў. А на канале ўжо навучыліся абыходзіцца без яго, у тым ліку падрыхтаваўшы новых каментатараў.
На «Беларусь 5» вяртаць у эфір Навіцкага не захацелі, а таму мякка параілі заняцца здароўем – пабыць у спакоі, без працоўнай нерваматання. Навіцкі ўпарціцца не стаў. Нейкі час заставаўся ў штаце тэлеканала, але ў эфір не выходзіў. Як кажуць нашыя крыніцы, даволі хутка «мэтр» зразумеў, што можна жыць і без тэлебачання. За час працы яму ўдалося абрасці сувязямі, а гэта гарантавала стабільныя запрашэнні на розныя мерапрыемствы. Так і наспела рашэнне выйсці на пенсію.
Увесну 2022-га стала вядома, што праз працяглую хваробу не стала Віталя Навіцкага – сына каментатара. Шмат гадоў ён працаваў прэс-сакратаром так званага МНС, але ў апошнія гады быў яшчэ і датычны да прапагандысцкага канала.
