Алыкулаў вярнуўся ў «Нёман» спантанна – заробак значна меншы, чым у Казахстане, тэрмін кантракту задаў рэжымны чыноўнік
Разлік – на еўракубкі не толькі ў гэтым сезоне.
4 жніўня «Нёман» абвясціў пра вяртанне ў каманду кыргызстанскага паўабаронцы Гулжыгіта Алыкулава. 22-гадовы вінгер ужо выступаў за гродзенцаў у сезоне-2019, пасля тры з паловай гады правёў у «Кайраце», з якім растаўся ў маі гэтага года – казахстанскі этап завяршыўся не найлепшым чынам.
Умовы кантракту ў Алыкулава ў Казахстане былі шыкоўнымі, прынамсі, па беларускіх мерках. Па словах нашых суразмоўцаў з казахстанскага футбола, з улікам бонусаў і пад'ёмных гадавы заробак паўабаронцы мог перавысіць 200 тысяч долараў. Гэта было значна менш, чым у іншых навічкоў «Кайрата» таго перыяду бразільца Вагнера Лава і паляка Яцэка Гуральскага, але куды больш, чым у казахстанскіх гульцоў. Ды і, паводле нашай інфармацыі, у еўрапейскіх клубах, якія былі зацікаўленыя ў Алыкулаве ў канцы 2019-га, футбалісту прапаноўвалі меншыя грошы, тым больш столькі не гатовы быў даваць ніводны клуб у Беларусі.
У сярэдзіне 2021-га беларускі трэнер Аляксей Шпілеўскі пакінуў «Кайрат». Коўч давяраў Алыкулаву – а вось наступныя галоўныя трэнеры каманды, Курбан Бердыеў і Кірыл Кекер, паўабаронцу пасунулі ў запас. Як распавялі нам спецыялісты, Алыкулаў проста не падыходзіў пад тактыку – абодва коўчы выкарыстоўвалі схемы без вiнгераў. Трэнеры ставілі футбаліста на іншыя пазіцыі, але там Гулжыгіт выглядаў не так, як ад яго хацелі.
Такі стан рэчаў кыргызстанцу не падабаўся, ён разам з агентам шукаў варыянты больш прадуктыўнага працягу кар'еры. Варыянты былі – цікавасць да Алыкулава праяўлялі варшаўская «Легія», прадстаўнікі Д2 Турцыі і элітнага дывізіёна Грэцыі. Але, паводле нашай інфармацыі, усе клубы былі гатовыя толькі на арэнду з правам выкупу, прычым не за тыя грошы, якія задаволілі б «Кайрат» – у клубе разлічвалі на куды большыя сумы, памятаючы, што аддалі за гульца 180 тысяч еўра і забяспечылі немалым заробкам.
У маі 2023-га Алыкулаў нарэшце пакінуў «Кайрат», для чаго самому гульцу прыйшлося заплаціць немалую кампенсацыю. Нашы суразмоўцы з Казахстана, знаёмыя са справамі «Кайрата», запэўніваюць, што калі гульца адпусцілі пасля выплаты, значыць, сума была дастаткова вялікай, каб задаволіць клуб, які адмаўляўся аддаваць вінгера ў еўрапейскія калектывы, каб не страціць у фінансах.
Да моманту, калі Алыкулаў скасаваў казахстанскі кантракт, «Нёмана» на гарызонце яшчэ не было. А вось іншых варыянтаў працягу кар'еры хапала. У прыватнасці, кыргызстанец мог апынуцца ў «Аляксандрыі» з УПЛ, клубах Д2 Бельгіі і Турцыі, элітнага дывізіёна Сербіі. Аднак кантракты зрываліся – у большасці сваёй з-за таго, што гулец і клуб не маглі дамовіцца па асабістых умовах. У выніку практычна тры месяцы Алыкулаў трэніраваўся самастойна.
Літаральна за некалькі дзён да 5 жніўня, дня закрыцця трансфернага акна ў Беларусі, на гульца і яго прадстаўнікоў выйшаў «Нёман». Як кажуць нашыя суразмоўцы, гэты варыянт узнік шмат у чым спантанна. Менавіта беларускі клуб прапанаваў гульцу вярнуцца, а не наадварот. Але ў выніку кантракт удалося ўзгадніць на працягу літаральна пары дзён.
Па нашых даных, гродзенцы шукалі ўзмацненне на фланг паўабароны як для бягучага сезона ЧБ, так і для матчаў еўракубкаў, дзе «Нёман» працягвае выступаць. Алыкулаў, на думку трэнераў і кіраўнікоў ФК, стаў прыдатнай кандыдатурай. Тым больш футбаліст – свабодны агент. Алыкулава прывабіла магчымасць згуляць у Лізе канферэнцый, а таксама ў прынцыпе вяртанне гульнявой практыкі. Хоць у першым матчы з «Цэле» у трэцім кваліфікацыйным раўндзе ЛК, паводле апошняй інфармацыі, Алыкулаў усё ж не згуляе – ён застаўся ў Гродне і займаецца афармленнем дакументаў. Чакаецца, што паўабаронца далучыцца да каманды перад матчам у адказ.
Па грошах кыргызстанец заўважна прайграў у параўнанні з Казахстанам, але, вядома, выйграў у параўнанні з першым гродзенскім этапам. У 2019-м «Нёман» даваў вінгеру зусім сціплыя грошы. Па нашых даных, стартавая зарплата Алыкулава ў Гродне тады была ў раёне 500 долараў – з умовай, што калі гулец дасць вынік, яе падвысяць у два разы. Дакладныя лічбы цяперашняй зарплаты нам даведацца не ўдалося, але Алыкулаву будуць плаціць на ўзроўні лідараў калектыву – а Павел Савіцкі, Ягор Зубовіч, Іван Садаўнічы зараз атрымліваюць у раёне 10 тысяч рублёў у месяц без уліку бонусаў. Пры гэтым, паводле нашых звестак, у будучыні для кыргызстанца прадугледжана павышэнне – у рамках дзяржліміту. Паводле яго, клубы могуць плаціць пяці гульцам падвышаныя заробкі з «недзяржаўных» сродкаў – да 17,5 тысячы рублёў у месяц да выліку падаткаў.
Працягласць кантракта Алыкулава з «Нёманам» – паўтара года. Як аказалася, такі тэрмін супрацоўніцтва – ініцыятыва Андрэя Хмеля, новага кіраўніка выканкама Лукашэнкі па Гродне. Рэжымны чыноўнік, прызначаны на пасаду ў канцы мая, па звестках нашых крыніц з белфутбола, увайшоў у справы «Нёмана» – і разлічвае, што клуб па выніках гэтага года зойме ў чэмпіянаце «еўракубкавае» месца, і Алыкулаў дапаможа ў Еўропе і ў 2024-м. Ды і ўвогуле, як удалося даведацца, Хмель мае намер па максімуме захаваць цяперашні склад каманды. Напрыклад, паводле нашых звестак, ужо прапанаваныя новыя кантракты Савіцкаму і Алімардону Шукураву. Плюс вядзецца праца па ўзмацненні калектыва на будучы сезон.
Фота: fcneman.by
