Карыстач пад нікам Іван Галаваты заявіў у тг-канале, што адыходзіць ад спраў хакейнага «Шахцёра». Здаецца, то пісаў рэальны бос «Беларуськалію», але ў клубе не панікуюць
Вось як набліжаны да Лукашэнкі функцыянер уплываў на справы ў клубе.
На мінулым тыдні ў тэлеграм-канале хакейнага клуба "Шахцёр" Салігорск адбылося нешта дзіўнае. Праз пару дзён пасля вылету з плей-оф Экстралігі хакеісты, пераможцы рэгулярнага сезона, прынеслі заўзятарам выбачэнні за вынік. У каментары да запісу прыйшоў карыстальнік пад нікам Іван Галаваты (так клічуць генеральнага дырэктара "Беларуськалія" і важнага функцыянера ў сістэме Лукашэнкі), які раскрытыкаваў каманду і заявіў пра тое, што больш не мае намеру ўдзельнічаць у справах хакейнага клуба.
Ці быў гэта рэальны Галаваты? Што будзе з хакеем у Салігорску, калі бос прадпрыемства-фундатара сапраўды перастане ім займацца? "Трыбуна" паспрабавала разабрацца ў пытанні.
Гэта сапраўды пісаў Галаваты?
Паведамленне ад імя менеджара з'явілася пад пастом, у якім ХК звярнуўся да заўзятараў пасля вылету з турніру: «Разумеем і падзяляем вашыя пачуцці, бо ўсё павінна было скончыцца не так... зусім не так».
Карыстальнік пад нікам Іван Галаваты ў сваім звароце выказаўся рэзка пра хакеістаў, для якіх, на яго думку, выраз «сіла ў камандзе» аказаўся пустым словам. І зазначыў, што «вы [верагодна, маючы на ўвазе гульцоў і трэнераў] пахавалі хакей у Салігорску, вось гэта самае сумнае».
Ну а ўжо ў наступным паведамленні карыстач Іван Галаваты задаецца пытаннем "навошта блакаваць генеральнага дырэктара?" Маўляў, яму баліць гэтак жа, як і астатнім заўзятарам.
Некаторыя з падпісантаў тэлеграм-канала «Шахцёра» засумняваліся, што паведамленні пакідаў сапраўды Галаваты - кіраўнік прадпрыемства-гіганта і кум Віктара Лукашэнкі.
- Зваць слабымі - гэта неяк не да твару кіраўніку, калі, вядома, гэта не фэйк акаўнт, - гаворыцца ў адным з паведамленняў.
Ну а калі адзін з карыстачоў выказаў меркаванне, што "было б выдатна, каб кожны займаўся сваёй справай", віртуальны Іван Галаваты пагадзіўся з гэтым і заявіў, што ён "прыняў рашэнне, што хакей у Салігорску далей будзе развівацца без майго ўдзелу".
- Многіх збянтэжыла час і месца выказванняў Галаватага. Але я ўсё ж упэўнены, што гэта пісаў менавіта генеральны дырэктар «Беларуськалія», – падзяліўся сваімі думкамі з «Трыбунай» адзін са спецыялістаў, які знаёмы з сітуацыяй у «Шахцёры». - Па-першае, успомніце, наколькі Галаваты блізкі да заўзятараў. Ён не раз наведваў трыбуны на дамашніх матчах каманды, быў на выязных паядынках. І там таксама сядзеў не на віп-трыбуне, а сярод звычайных гледачоў. Таму не варта дзівіцца яго з'яўленню ў тэлеграме і дыялогу з карыстачамі. Па-другое, калі б гэта быў фэйкавы акаўнт, то ніводнае паведамленне не вісела б да гэтага часу. Мадэратары выдалілі адно з іх спачатку. Але па сваім досведзе магу меркаваць, што далей сітуацыя развівалася так: Галаваты патэлефанаваў у клуб і выказаў прэтэнзіі, што яго блакуюць. І далей ужо карыстальніка не чапалі.
У тым, што ў ТГ-канале «Шахцёра» пісаў рэальны Галаваты, перакананыя і іншыя спецыялісты, хто перасякаўся з лукашэнкаўскім менеджарам, а таксама некаторыя супрацоўнікі «Шахцёра».
- У Беларусі ж заўзята змагаюцца з нібыта фейкамі. І калі нешта недзе напісана не так і не тым, то хутка робяць абвяржэнне або выдаляюць каментары. Тут гэтага няма. Так што высновы напрошваюцца самі. Тым больш мы ж разумеем, што калі б гэта быў не Галаваты, то ён бы сам даўно распарадзіўся, каб выдалілі таго, хто піша нібыта пад яго імем, - робіць высновы іншы наш суразмоўца.
Які ўплыў у Галавата на ХК?
Пра тое, што значыць "далей хакей у Салігорску будзе развівацца без мяне", Галаваты не растлумачыў. Таму многія, у тым ліку спецыялісты з белхакея, сталі задавацца пытаннем, пра што тут ідзе гаворка. Менеджар, які разгарнуў маштабныя рэпрэсіі супраць шахцёраў пасля выбараў-2020, меў істотны ўплыў на жыццё клуба.
- Ад лета 2022 года абавязкі генеральнага дырэктара клуба выконвае малады хлопец Ягор Кушнярэвіч. Яму 29 гадоў. Раней сам гуляў у хакей, браў медалі ЧБ, працаваў менеджарам у «Дынама-Маладзечне» і трэнерам па навукова-метадычнай частцы ў «Шахцёры». Цяпер - в.а. дырэктара. Ён знаходзіцца пад моцным уплывам Галаватага, - адзначаюць нашыя суразмоўцы. - Справа ў тым, што гендыр «Беларуськалія» быў у курсе абсалютна ўсяго [што адбывалася ў клубе], імкнуўся вырашаць вельмі многія пытанні: трансферы, заробкі, праца з заўзятарамі, шоў на матчах. Практычна кожны крок у ХК узгадняўся з Галаватым. Усё рабілася з яго дазволу. Ці не рабілася, калі нешта не было ўхвалена. Так што ўплыў Галаватага на ўсе працэсы ў клубе вельмі і вельмі моцны.
Адзінае, як адзначаюць знаёмыя з сітуацыяй людзі, Галаваты не лез у працу трэнераў.
- Вось склад ён дакладна не вызначаў. Гэта цалкам на сумленні трэнерскага штаба на чале з Яраславам Чупрысам, - кажа адзін з прадстаўнікоў «Шахцёра». - Вядома, Галаваты мог пацікавіцца, чаму Чупрыс паставіў таго ці іншага выканаўцу, але ніколі не выказваў пажаданні, не загадваў, каб хтосьці гуляў, а хтосьці сядзеў на лаўцы.
Пры гэтым Галаваты быў частым госцем у распранальні каманды. У перапынках матчаў, на якіх прысутнічаў менеджар, ён заходзіў да хакеістаў і мог пакрытыкаваць (куды часцей) або пахваліць.
З'яўленне вялікіх начальнікаў у распранальні падчас матчаў - практыка вельмі распаўсюджаная ў айчынным спорце. І не толькі ў хакеі. Не сакрэт, што ў свой час з "матывацыйнымі" прамовамі ў перапынках перад спартсменамі выступалі ўладальнік мінскага "Дынама" Юрый Чыж або кіраўнік БАТЭ Анатоль Капскі. Таму і ў паводзінах Галаватага няма нічога дзіўнага.
- Ён часам прыходзіў у распранальню і на «Будаўніку», калі мы гулялі ў ЧБ, і ўсе ўспрымалі гэта спакойна, таму што разумелі, што гэта за чалавек, які ён уплыў аказвае на клуб. Жадаў, каб быў вынік, мог пагаварыць з гульцамі пасля матчаў, але ў асноўным справамі займаліся іншыя людзі, - кажа адзін з чальцоў футбольнага «Шахцёра».
- Устаноўку на матчы або на перыяд даваў Чупрыс, - працягвае наш суразмоўца ўжо са свету хакея. - Ну а Галаваты ў сезоне мог некалькі разоў сабраць гульцоў і трэнераў у канферэнц-зале лядовага палаца і правесці, скажам так, лекцыю, выказаць меркаванне пра тое, як гуляе каманда, чаго ёй не хапае, дзе трэба дадаць. Можа, недзе заматываваць, у тым ліку фінансава. Такія сходы былі нячастымі, але здараліся. І ўсе ўспрымалі іх спакойна, таму што разумелі, што Галаваты - гендыр прадпрыемства, якое спансуе клуб. Паслухалі, памаўчалі - і разышліся, - распавёў пра унутранае жыццё хакейнага клуба адзін з прадстаўнікоў «Шахцёра».
Пры гэтым, як адзначаюць нашыя суразмоўцы, з боку менавіта Галаватага няма ідэалагічнай напампоўкі. І калі ў 2020-м у камандзе масава падпісвалі зварот за Лукашэнку, гендыр «Беларуськалія» наўпрост гульцоў да гэтага не штурхаў.
- Прынамсі хакеісты не чулі нічога такога, - кажа адзін з нашых суразмоўцаў.
Што ўсё ж азначаюць словы пра адыход ад хакейных спраў?
Людзі, знаёмыя з унутранай кухняй "Шахцёра", адзначаюць, што пакуль да канца не зразумела, што значаць словы Галаватага пра тое, што "далей хакей у Салігорску будзе развівацца без майго ўдзелу".
- Адно можна сказаць з упэўненасцю: «Беларуськалій» і надалей будзе спансаваць «Шахцёр». Нават не магу ўявіць, каб прадпрыемства адхрысцілася ад ХК. Магчыма, у кагосьці з лідараў заробкі ўпадуць, можа, памяняюць трэнерскі штаб. Але ўсё гэта толькі здагадкі, - кажа адзін з нашых суразмоўцаў.
Зарплатная ведамасць у «Шахцёры», як і ў іншых клубах Беларусі, абмежаваная 100 тысячамі рублёў на месяц - такі ліміт федэрацыі хакея. Усе гэтыя грошы размяркоўваюцца на каманду - 25-27 гульцоў. Моладзь атрымлівае ў дыяпазоне 1-2 тысячы рублёў, лідары - куды больш. Як мяркуюць спецыялісты, тым, хто не апраўдаў спадзеваў, у новым сезоне заробкі абрэжуць.
- Плюс можна выказаць здагадку, Галаваты менш будзе заходзіць у распранальню, не будзе збіраць гульцоў у канферэнц-зале. Магчыма, усё, што ён хацеў вырашаць у «Шахцёры» (трансферы, шоў і гэтак далей), пакіне на іншых людзей. Але зусім ад справаў клуба не сыдзе. Занадта ён любіць хакей і «Шахцёр».
Таксама нашыя суразмоўцы схіляюцца да таго, што заяву Галаватага трэба ўспрымаць з пэўнай доляй скепсісу – толькі час пакажа, наколькі сур'ёзны лукашэнкаўскі кіраўнік у сваіх словах.
- Думаю, напісаў ён на эмоцыях. Галаваты вельмі хацеў, каб клубы са структуры "Шахцёра" зрабілі залаты хет-трык. Летась чэмпіёнамі сталі футбольная і валейбольная каманды з Салігорска (валейбалісты і цяпер прабіліся ў фінал - Tribuna.com). У гэтым сезоне хацеў, каб золата ўзялі і хакеісты. А тут такі правал: вылет у паўфінале пасля перамогі ў «гладкім» чэмпіянаце. Вось Галаваты і напісаў ад засмучэння. Так што я б не рабіў паспешных высноў з ягонага «выхаду» да заўзятараў. Пачнецца перадсезонка, а там будзе бачна, - сказаў на заканчэнне наш суразмоўца.
У завяршэнне адзначым, што, паводле нашай інфармацыі, панікі ў клубе пасля паведамленняў Галаватага няма. Ад гендыра "Беларуськалія" нічога іншага на адрас ХК не паступала, а таму як і чым будзе жыць "Шахцёр" у новым сезоне, яшчэ не вырашана.
Ну і ці адыдзе ад хакейных спраў Галаваты, яшчэ вялікае пытанне.
Фота: esoligorsk.by, vgr.by
