Ксенія Малашка: «У Беларусі, мне падаецца, не хапае талерантнасці, наш народ не разумее шмат якіх рэчаў. Напрыклад, мяне спыталі ў інтэрв'ю, як я стаўлюся да геяў»
Беларуская баскетбалістка Ксенія Малашка, выбраная «Чыкага Скай» на драфце WNBA, у інтэрв'ю тэлеграм-каналу «О, спорт! Ты – мир!» падзялілася меркаваннем пра Беларусь.
– Кім сябе больш адчуваеце – амерыканкай ці па-ранейшаму беларускай?
– Я б сказала, што ўжо больш на амерыканскім баку. Навучылася не асуджаць людзей за іх пазіцыі і погляды, разумею, што кожны займаецца сваімі рэчамі.
А ў Беларусі, мне падаецца, не хапае талерантнасці. Наш народ не разумее шмат якіх рэчаў. Напрыклад, мяне спыталі ў інтэрв'ю, як я стаўлюся да геяў. Ды ніяк. Што мне ад гэтага? Беларусы, мне падаецца, калі не разумеюць тое, што адрозніваецца ад іх уяўленняў, гэта асуджаюць. Бракуе талерантнасці.
А вось амерыканцы спакойна рэагуюць на абсалютна розныя праявы чалавечага жыцця. Вось і мне ні цеплыня ні холадна ад таго, што побач можа быць гей. Гэта іхняя справа, як жыць, што рабіць. У гэтым плане адчуваю сябе больш амерыканкай, чым беларускай.
І справа не толькі ў ЛГБТ, але і шмат у якіх іншых рэчах. Да таго ж ЗША – краіна эмігрантаў, тут вельмі шмат людзей з усяго свету, і гэта выхоўвае талерантнасць. Пакуль у Беларусі не будзе чагосьці падобнага, то і стаўленне людзей да чагосьці іншага будзе адпаведным.
– Як даўно бывалі ў Беларусі?
– З 2021 года не прыязджала. І, сапраўды, сумую больш не па краіне, а па сябрах і родным. Я больш прывязваюся да людзей, чым да месцаў. Таму хачу хутчэй убачыць родных і блізкіх.
– Калі амерыканцы даведаюцца, што вы з Беларусі, што пытаюцца, што іх цікавіць?
– Мне здаецца, ім наогул усё роўна, таму што, як ужо сказала, тут сабраны прадстаўнікі самых розных народаў. І амерыканцам усё роўна, адкуль ты прыехаў. Больш за тое, мяне ўспрымаюць ужо як сваю.
Амерыканцы нават не ведаюць, дзе знаходзіцца нашая краіна :). У дзяцінстве вучылі геаграфію, можа, нешта чулі, а так людзі практычна нічога не ведаюць не тое што пра Беларусь, а ў прынцыпе пра Еўропу.
Іх проста не хвалюе тое, што адбываецца на іншым кантыненце. Галоўнае для іх – што адбываецца ў Амерыцы, як уладкаваная мясцовае жыццё. Многія нават не ведаюць, што адбываецца ў Еўропе, – сказала Малашка.
