Гулец зборнай Беларусі Канстанцінаў: «Калі самааддача будзе, то павiнны выходзіць у паўфінал ЧС»

«Асабліва эмоцый зараз няма, усё пакінулі на полі, стомленасць крыху назапасілася. Рады, вядома, што перамаглі і зарабілі рэйтынгавыя ачкі. Неяк не адразу ўвайшлі ў гульню. Павінны былі адразу кантраляваць матч. Але калумбійцы таксама малайцы, жыўчыкі і змагаюцца. У іх былі свае моманты, але яны іх не рэалізавалі. А мы справіліся са сваёй задачай.

Прасілі нас не весціся на правакацыі, бо шмат хто пад карткамі з гульцоў. Нават калі сфалілі, то папрасіць прабачэння і пайсці. Нам часам цяжка дамінаваць, калі каманда суперніка закрываецца. Але калі мы самі як сабакі ў будцы, а потым ідзем у контратаку, тое атрымліваецца ўсё вельмі нават добра. Мне падаецца, што гэта наш козыр.

Партугалія — добрая каманда. Апошні раз мы яе абгулялі, таму эмацыйны фон на нашым баку. У чвэрцьфінале будуць вырашаць найменшыя эпізоды. Думаю, калі па самааддачы ўсё будзе добра, то павінны праходзіць», — сказаў Канстанцінаў.

Зборная Беларусі згуляе супраць зборнай Партугаліі ў 1/4 фіналу чэмпіянату свету. Матч адбудзецца 22 лютага а 16:00.