Першая сустрэча Тайсана і Льюіса. Ім не было і дваццаці, трэнер Майка засцерагаў свайго баксёра
Праз гады яны ўчынілі адну з самых дзікіх бітваў хэвівейта.
Бітва Майка Тайсана і Ленакса Льюіса – адна з самых шалёных у звышцяжкай вазе пачатку 2000-х. Бойкі на прэс-канферэнцыі, абяцанні з'есці дзяцей – усяму гэтаму папярэднічала мілае знаёмства і некалькі дзён працы ў трэніровачным лагеры.
Упершыню будучыя сапернікі сустрэліся ў 1983 годзе. Майку – 17 гадоў, Ленаксу – 18 гадоў. Льюіс выступаў за зборную Канады і толькі-толькі выйграў чэмпіянат свету сярод юніёраў, які праходзіў у Дамініканскай рэспубліцы.
Першы паядынак – чвэрцьфінал супраць амерыканца Вісэнта Джонсана і лёгкія 5-0 ад суддзяў. У паўфінале Ленакс перабаксіраваў Дорына Ракару з Румыніі, а кубінец Педра Квесада не з'явіўся на фінальны паядынак. Пачуццё ад перамогі некалькі сапсавала толькі фраза, кінутая адным з членаў каманды ЗША: «Ты яшчэ не біўся з найлепшым».
«Я здзівіўся. Няўжо ЗША прывезлі не найлепшую каманду? Аказалася, у іх быў адзін хлопец, які разам з трэнерам не вельмі любілі лётаць на самалётах – Майк Тайсан і Кас Д'Амата», – распавядаў Льюіс у інтэрв'ю Джо Рогану.
Па вяртанні ў Канаду Льюіс і яго трэнер Эрні Бём паляцелі ў Катскіл на базу Тайсана на чатыры дні і пагадзіліся спарынгаваць з Майкам.
«Ён падаўся мне добрым хлопцам з першых хвілін. Майк паказаў мне некалькі старых фільмаў пра баксёраў мінулага, якія я раней не бачыў і распавёў, што вывучаў кожнага з іх.
Мы гулялі з ім па горадзе і нават хадзілі на танцы пасля трэніровак», – дзяліўся ўражаннямі Ленакс.
Спарынгі выдаліся канкурэнтнымі, а ў апошні дзень Кас Д'Амата нават перасцярог Майка. Пра гэта таксама распавядаў Льюіс:
«Першы спарынг, гонг, ён адразу пайшоў на мяне і паспрабаваў забіць. Я ж намагаўся рабіць тое ж, што і Махамед Алі. Намагаўся трымацца як мага далей ад ягонай сілы. Аднак першы дзень для мяне атрымаўся вельмі неспакойным.
Другі прайшоў крыху спакайней, а ў апошні дзень спарынгаў я быў лепшым за Майка.
Памятаю, як Кас Д'Амата сказаў: «Майк! У адзін дзень ты сустрэнешся з ім, не рабі больш такога! І гэта заўсёды рэхам гучала ў мяне ў галаве: «Мы калі-небудзь будзем біцца?» Кас Д'Амата сказаў, што мы паб'емся, і гэта сапраўды адбылося».
***
У паўнавартасным паядынку Ленакс Льюіс і Майк Тайсан сустрэліся ў 2002-м. Брытанец у канцы папярэдняга года адказаў на паражэнне ад Рахмана жахлівым накаўтам у рэваншы і валодаў тытуламі IBF, IBO і WBC. Для амерыканца гэты бой – апошняя спроба заскочыць у цягнік чэмпіёнства і вялікіх дасягненняў.
На прэс-канферэнцыях Тайсан ашалеў. Кінуўся біцца з Ленаксам, абяцаў з'есці дзяцей брытанца, хоць у яго тых не было, а пацярпеў нават прэзідэнт WBC Маўрысіа Сулейман, якому таксама прыляцела з натоўпу.
Паміж баксёрамі была мяжа з аховы, каб яны не перайшлі да справы раней.
А трэнер Льюіса Эмануэль Сцюард зліўся настолькі, што штурхаў свайго байца:
«Ты павінен біць! Хопіць хадзіць вакол яго! Гэты чалавек небяспечны да таго часу, пакуль знаходзіцца насупраць цябе!»
У восьмым раўндзе Льюіс скончыў паядынак накаўтам.
Фота: MMA History Today
