Зарплаты гульцоў «Чэлсі», якія прыйшлі пры Баэлі, могуць знізіцца ў выпадку нетрапляння клуба ў ЛЧ

Нягледзячы на выдаткі больш за 600 мільёнаў фунтаў стэрлінгаў за апошнія два трансферныя вокны, уладальнікі «Чэлсі» Тод Баэлі і Бехдад Эгбалі пачалі працэс скарачэння зарплатнага фонду клуба, паведамляе The Telegraph.

Большасць гульцоў, якіх клуб падпісаў на пастаяннай аснове ў апошнія два трансферныя вокны, пагадзіліся змяніць умовы сваіх кантрактаў у выпадку нявыхаду ў Лігу чэмпіёнаў. У некаторых выпадках зарплата гэтых гульцоў можа знізіцца на 25% і больш, калі «сінія» не кваліфікуюцца ў ЛЧ.

Гэты крок быў распрацаваны клубам, каб абараніць «Чэлсі» ад некаторых фінансавых наступстваў пропуску Лігі чэмпіёнаў.

Пры Рамане Абрамовічу гульцам гарантавалі поўны заробак, незалежна ад таго, ці фінішаваў «Чэлсі» ў топ-4 АПЛ. Таму футбалістаў, якіх падпісалі да змены ўладальніка клуба, абмінуць такія абмежаванні.

Абрамовіч выплачваў больш высокія гарантаваныя заробкі, а бонусы даваў толькі за выйгрышныя трафеі. Баэлі ж хоча стымуляваць футбалістаў бонусамі за розныя дасягненні.

Пасля 25 тураў «Чэлсі» ідзе 10-м у АПЛ, адставанне ад 4-га месца – 11 ачкоў.