У Егіпце арбітра дыскваліфікавалі за адменены гол пасля прагляду паўтору на тэлефоне балельшчыка

Галоўны арбітр матча другога па сіле дывізіёна Егіпта «Суэц» – «Аль-Наср» (3:1) Махамед Фарук дыскваліфікаваны на нявызначаны тэрмін за прагляд паўтору эпізоду сустрэчы з тэлефона заўзятара.

Таксама адхілена ўся судзейская брыгада.

«Камітэт вырашыў расследаваць інцыдэнт, калі Махамед Фарук скарыстаўся мабільным тэлефонам для прагляду паўтору аднаго з эпізодаў матчу», – заявілі ў Федэрацыі футбола Егіпта.

Гульцы «Суэца» ў эпізодзе з прапушчаным голам апелявалі, што супернік згуляў рукой, але ВАР на гэтым узроўні не задзейнічаны.

Тады рэферы выкарыстаў відэазапіс з тэлефона аднаго з балельшчыкаў, пасля чаго адмяніў гол.

Суддзя пакідаў стадыён пад аховай паліцыі, а прадстаўнікі «Аль-Насра» пагражалі падаць на яго ў суд за парушэнне рэгламенту.