Трэнер «Дынама»-1982 Усенка: «Глеб і Кутузаў былі асобамі, а такіх сёння ў беларускім футболе няма»

Трэнер мінскага «Дынама», якое ўзяло чэмпіёнства ў 1982 годзе, Анатоль Усенка раскрытыкаваў цяперашніх беларускіх футбалістаў.

«Бываюць моманты, калі футбалісты выходзяць гуляць за зборную, і, на мой погляд, не аддаюцца на поле, як бы мне хацелася. Можна прайграць, гэта футбол, але прайграць з добрай якасцю, каб балельшчыкі не задавалі пытанняў. Мы ў мінскім «Дынама» таксама прайгравалі, але ніхто не мог сказаць, што Пракапенка дрэнна гуляў, што Пудышаў дрэнна гуляў, Курненін. Ды любы. У нас не была каманда зорак, у нас была каманда-зорка.

Кожны чалавек – асоба. Такой асобы сёння ў беларускім футболе няма. Так, быў Саша Глеб, быў Кутузаў, а зараз? Цяпер ёсць усе ўмовы, добры заробак, экіпіроўка, добрыя палі, гуляйце, калі ласка. Заўзятары чакаюць. Калі вы будзеце гуляць добра, вас паласкаць не будуць, а калі будзеце гуляць дрэнна – будуць паласкаць на кожным куце. Мы без грошай абыгрывалі Бразілію і Аргенціну, а вы за грошы не можаце абгуляць іншыя каманды», – цытуе Усенку sport5 са спасылкай на «Спорт-кадр».