Ягор Пархоменка: «Нёман» кантраляваў большую частку гульні з мінскім «Дынама». Нічыйны вынік быў бы больш лагічным»
Абаронца «Нёмана» Ягор Пархоменка пракаментаваў паражэнне ад мінскага «Дынама» (1:2) у 21-м туры вышэйшай лігі.
– Як ацэніш вынік матчу? Лік заканамерны?
– Магчыма, нічыйны вынік быў бы больш лагічным у гэтым матчы. Мы кантралявалі большую частку гульні. Супернік выбягаў на контратаках, больш нічога асабліва не ствараў. У нас былі нядрэнныя моманты і маглі забіваць відавочна больш, чым адзін мяч.
– Ці разглядаў трэнерскі штаб гэты матч як галоўны ў сезоне? Падрыхтоўка да гульні можа была іншая?
– Увесь ажыятаж вакол матчу, заўзятары – усё гэта стварала атмасферу. З-за гэтага гульня мелася на ўвазе, як галоўная ў туры і ў сезоне. Усё ж змагаліся дзве каманды, якія змагаюцца за чэмпіёнства.
– З Гродна прыехалі дзевяць аўтобусаў. Гэта як мінімум 500 чалавек. Ці дапамагала іх падтрымка сёння?
– Падтрымка нашых фанатаў рухала наперад да чужых варот. Дзякуй ім за тое, што прыехалі, падтрымалі і былі з намі да канца. Магчыма, дзякуючы ім не саступалі на поле і нават дамінавалі. Шкада, што прайгралі. Але нічога страшнага, рухаемся далей, як гаворыцца. У любым выпадку яшчэ нічога не страчана. Наперадзе шмат гульняў, таму будзем дужацца да канца. Самае галоўнае – не губляць ачкі ў наступных матчах і набіраць па максімуме, дзе гэта магчыма. Не глядзець таксама на гульню «Дынама», не чакаць іх асечкі, а рухацца сваім шляхам, – сказаў Пархоменка.