УАФ накіравала ліст ва ўсе еўрапейскія футбольныя федэрацыі з заклікам байкатаваць расійскія зборныя

Украінская асацыяцыя футбола (УАФ) накіравала ліст усім еўрапейскім футбольным федэрацыям з заклікам байкатаваць матчы з расійскімі юніёрскімі зборнымі, паведамляе The Times. Раней УЕФА дазволіў расійскім зборным U-17 удзельнічаць у міжнародных турнірах.

«УАФ звяртаецца да вас з просьбай байкатаваць магчымыя матчы з удзелам каманд з Расіі [калі такія будуць запланаваны]. Мы перакананыя, што любы крок да рэінтэграцыі расійскіх прадстаўнікоў з'яўляецца небяспечнай і жудаснай тэндэнцыяй, якая азначае не што іншае, як падтрымку расійскай тэрарыстычнай дзяржавы і ўсіх іх злачынстваў, ужо здзейсненых і якія здзяйсняюцца ва Ўкраіне», - гаворыцца ў тэксце ліста.

Да гэтага ўсе расійскія клубы і зборныя былі адхіленыя ад спаборніцтваў з-за агрэсіі РФ супраць Украіны. Рашэнне пра байкот матчаў з расіянамі ўжо прынялі ў Літве, Латвіі, Эстоніі, Польшчы, Швецыі, Фінляндыі, Даніі, Нарвегіі, Ірландыі і Англіі.