Інданезія, Аўстралія, Малайзія і Сінгапур могуць падаць сумесную заяўку на правядзенне ЧС-2034

Інданезія вядзе перамовы з Аўстраліяй, Малайзіяй і Сінгапурам па падачы сумеснай заяўкі на правядзенне чэмпіянату свету па футболе 2034 года, паведамляе insidethegames.

«Мы абмяркоўваем прапанову з Аўстраліяй.

Калі я наведаў Малайзію і Сінгапур, абедзве краіны выказалі зацікаўленасць далучыцца да Інданезіі і Аўстраліі. Мы дастаткова моцныя.

Я думаю, ФІФА паклапоціцца аб тым, каб Блізкі Усход быў гаспадаром турніру, як і Катар у мінулым годзе. Японія і Карэя таксама былі гаспадарамі. Я ўпэўнены, што ФІФА паспрабуе іншыя краіны.

Патэнцыял перамогі, калі мы аб’яднаемся з Аўстраліяй, Малайзіяй і Сінгапурам, таксама вялікі», – сказаў кіраўнік Футбольнай асацыяцыі Інданезіі (PSSI) Эрык Тохір.

Тохір дадаў, што гэтая ідэя не з’яўляецца нечым новым, абмеркаванні з Аўстраліяй вядуцца яшчэ з 2017 года.

Паводле інфармацыі Antara, прэзідэнт Інданезіі Джока Відада падтрымаў гэтае яшчэ не афіцыйнае рашэнне.

Адзіным канкурэнтам гэтых краін на гэты момант з’яўляецца Саудаўская Аравія, якая ўжо накіравала ФІФА ліст са сваімі намерамі.

ФІФА ўстанавіла канчатковы тэрмін падачы заявак – да 31 кастрычніка, толькі краіны з Азіі і Акіяніі маюць такое права.

У сакавіку гэтага года Інданезію пазбавілі права на правядзенне чэмпіянату свету U-20 з-за адмовы прымаць Ізраіль. Інданезія з’яўляецца мусульманскай нацыяй і не мае дыпламатычных адносін з Ізраілем, яны публічна падтрымліваюць палестынцаў.

Таксама сёлета інданезійскі Балі адмовіўся ад правядзення Сусветных пляжных гульняў з-за недахопу сродкаў.

Заяўку Саудаўскай Аравіі на правядзенне ЧС-2034 таксама сутыкнуліся з крытыкай у сувязі з дрэнным захаваннем правоў чалавека ў краіне.