Карповіч пра еўракубкі «Нёмана»: «Амаль паўтара месяца без сям'і – цяжка. Звар'яцелі б, не вярніся б на два дні ў Гродна»

Нагадаем, што з сакавіка 2022-га ўсе клубы і зборныя Беларусі могуць праводзіць дамашнія матчы выключна на нейтральнай тэрыторыі і без гледачоў на трыбунах. Такое рашэнне прынятае з-за вайны ва Украіне, якую з 24 лютага 2022 года працягвае Расія з выкарыстаннем тэрыторыі Беларусі.

– Шмат сказана пра выступ ў Лізе канферэнцый, якое здарылася для «Нёмана» па волі абставінаў. Адзінае, спытаю вось пра што: на «Цэле» ў трэцім кваліфікацыйным раўндзе банальна не засталося сіл пасля працяглага знаходжання па-за домам?

– Былі ў Еўропе амаль паўтара месяца. Так доўга без сям'і і блізкіх – цяжка. Там жа асабліва нікуды не выйсці, усё абмяжоўвалася трэніроўкамі, аднаўленнем і матчамі. Можна параўнаць са зборамі – гульцы пастаянна бок у бок. Жадаеш не жадаеш, а стомленасць з кожным матчам назапашвалася. І да супрацьборстваў са славенцамі гэты фон сапраўды стаў вырашальным фактарам. Асабліва ў другім матчы. І то мы ўсё ж такі на два дні вярнуліся ў Гродна. А каб і гэтай кароткай пабыўкі не было... Звар'яцелі б. Тое ж і ў зборнай. Як было пасля матча з румынамі? Суткі дабіраліся да Швейцарыі – і адразу перадгульнявая трэніроўка. Бо затрымалі рэйс. Усё гэта накладвае адбітак.

– Чаму «Нёман» у еўракубкавай кампаніі выступіў больш паспяхова, чым іншыя беларускія клубы?

– Калі б прайшлі «Цэле», то ў плэй-оф супернічалі б з тэль-авіўскім «Макабі». Выйсці ў групавы этап было неймаверна цяжка. А калі адказваць на пытанне, то арыгінальнасцю не адзначаюся: усе мы проста хацелі ўявіць Беларусь на еўраарэне як мага лепш, праявіць сябе. Усе хлопцы аддаваліся барацьбе, біліся адно за аднаго. Узаемавыручка на полі была найвышэйшая. Залімітавая матывацыя і дала такі вынік. Вось калі б мы гулялі хатнія паядынкі не ў Венгрыі, а ў Беларусі – невядома, якім аказаўся б вынік бітвы з «Цэле». Бо там нібы атмасфера звычайнага спарынгу, а не еўракубкавага паядынку. Трыбуны пустыя... У Гродна быў бы аншлаг, – сказаў Карповіч.