«МЮ» гатовы правесці чыстку складу летам. Сысці могуць Магуайр, Каземіра, Варан і яшчэ 8 гульцоў асновы

«Манчэстэр Юнайтэд» гатовы правесці чыстку складу гэтым летам, каб дапамагчы паскорыць прагрэс на полі пад кіраўніцтвам новага мінарытарнага ўладальніка каманды Джыма Рэткліфа, паведамляе ESPN.

У «Юнайтэд» ёсць грошы, якія можна выдаткаваць у наступнае трансфернае акно, але таксама ёсць занепакоенасць фінансавым становішчам клуба, у прыватнасці парушэнні правіл па прыбытку і стабільнасці, што можа абмежаваць даступныя сродкі. Таму клуб хоча павялічыць бюджэт за кошт продажу некаторых гульцоў.

Пад пытаннем будучыня 11 футбалістаў першай каманды. Сярод іх Крысціян Эрыксен, Рафаэль Варан, Каземіра, Хары Магуайр, Скот Мактаміней, Аран Уан-Бісака і Віктар Ліндэлёф.

Антані Марсьяль, кантракт якога заканчваецца летам, пакіне каманду на правах свабоднага агента.

Таксама «МЮ» хоча спыніць супрацоўніцтва з гульцамі, якія зараз знаходзяцца ў арэндзе. Гэта Джэйдан Санча, Доні ван дэ Бек, Факунда Пельістры і Брэндан Уільямс.

«Юнайтэд» спадзяюцца падпісаць летам нападаючага і абаронцу, а таксама палепшыць агульную якасць каманды.

Галоўны трэнер каманды Эрык тэн Хаг занепакоены пагаршэннем вынікаў з-за траўм Лісандра Марцінеса і Люка Шоу, а таксама з-за таго, што Расмус Хёйлунд з-за адсутнасці іншых варыянтаў у нападзе быў вымушаны згуляць больш матчаў, чым планавалася.

Хёйлунд у сезоне 2023/24 ужо правёў 30 матчаў – гэта ўсяго на 4 менш, чым ён згуляў за ўсю мінулую кампанію ў складзе «Аталанты». Трансфер форварда дапаможа знізіць нагрузку на 21-гадовага датчаніна.