Ягор Пагостнаў: «Лічыце, што «Арсенал» у другім тайме саступіў? Так, у нас быў момант толькі ў канцы, а хіба ў «Тарпеда» шмат было»

Расійскі абаронца дзяржынскага «Арсенала» Ягор Пагостнаў пракаментаваў паражэнне ад «Тарпеда-БелАЗ» (0:1).

– Засталіся змешаныя ўражанні, таму што мы не атрымалі перамогу, хоць па гульні маглі гэтага дамагчыся. На жаль, свае шанцы не выкарыстоўвалі, а ў абароне дапусцілі адзін момант і пасля яго прапусцілі. А так, як я ўжо зразумеў, у чэмпіянаце Беларусі шмат завязана на барацьбе і тут ёсць магчымасці, каб развівацца.

– У першым тайме «Арсенал», калі і не перайграў «Тарпеда», то, як мінімум, не саступіў. Чаму не атрымалася згуляць гэтак жа ў другім?

– А вы лічыце, што мы ў другім саступілі? Ну так, у нас быў момант толькі ў канцы, а хіба ў «Тарпеда» шмат іх было? Лічу, што ў абодвух таймах гульня была абсалютна роўная і ішла да гола.

– Канцоўку матчу вы правялі ў нападзе. Ці пераводзілі вас раней калі-небудзь з абароны ў атаку і ці ўдавалася тым самым калі-небудзь выратаваць сваю каманду?

– Я наогул да 12 гадоў нападнікам быў. Так, і з абароны ў атаку па ходзе матчаў таксама пераводзілі. Каб ратаваў каманду ў канцоўцы, такога не ўзгадаю, але сёння момант быў.

– Не без сарказму пытаюся, гэта самы круты стадыён, на якім вас даводзілася гуляць?

– Так я ж ужо гуляў тут у складзе зборнай Расіі. Для мяне самае галоўнае, што тут добрае поле, якое дазваляе гуляць у футбол. А самы класны для мяне – гэта, вядома, «РЖД Арэна». Там вельмі эмацыйная атмасфера. А калі на кубкавых матчах збіраецца шмат заўзятараў – гэта наогул феерыя.

– Як часта ў Расіі вам даводзілася гуляць на штучных палях?

– Напэўна, толькі ў Арэнбурзе. Наколькі гэта нязвыкла? Калі 15 матчаў гуляеш на натуральным, а потым прыпадае на штучным, гэта нязвыкла, вядома. Іншае счапленне, на іншыя мышцы нагрузка. А калі ўвесь час, то нармальна, – сказаў Пагостнаў.