Учора ў Дубаі ўручылі Global Soccer Awards. Распавядаем, хто стаў пераможцам.
Global Soccer Awards упершыню ўручылі ў 2010 годзе. Але тады прэмія пазіцыянавала сабе хутчэй як каляфутбольная, і вызначала не найлепшых гульцоў і трэнераў, а налепшых функцыянераў. У 2010 годзе было ўсяго тры намінацыі: агент года (Жорже Мендеш), кіраўнік года (CEO мадрыдскага «Атлетыка» Мігель Анхель Марын) і спецыяальная ўзнагарода (што б гэта не значыла) для Адрыяна Галіяні. Выглядае неяк зусім не салідна. Год за годам прэмія расла і зараз на яе, у адрозненні напрыклад ад прэміі ФІФА, прыяжджаюць бадай усе галоўныя намінанты. Прадстаўляем вам спіс самых важных намінацыйGlobal Soccer Awards-2023:
Найлепшы футбаліст года: Эрлінг Холанд
Папярэднік: Карым Бензема
Эрлінг Холанд разам з «Ман Сіці» ўзяў трэбл (АПЛ, ЛЧ і Кубак Англіі) і асабіста ірваў на шматкі інфапрастору сваімі галамі. Таму ўзнагарода гульцу года не павінна здзіўляць.
Найлепшая футбалістка года: Айтана Банмаці
Папярэдніца: Алекса Путэльяс
Пераможца жаночага ЧС у складзе зборнай Іспаніі таксама ўзяла ЛЧ і Ла-Лігу за «Барселону». Акрамя таго, іспанка дзеючая ўладальніца Залатога Мяча. Абсалютна заслужаная ўзнагарода.
Найлепшы гулец года па версіі заўзятараў: Крышціяну Раналду
Папярэднік: Махамед Салах
Тут пытанні могуць ўзнікнуць, але на тое яна і прэмія фанатаў. З іх не спытаеш. Хай прыз Кріышціяну больш падобны на суцяшальны, але ён, на хвілінку, найлепшы бамбардзір у свеце ў 2023 годзе. 54 галы у 39 гадоў гэта вам не жарт.
Найлепшы малады гулец: Джуд Белінгем
Папярэднік: Віктар Асімхен
Джуд цудоўна пачаў у «Рэале» і хутка рушыць (на наш суб'ектыўны погляд) да дасканаласці. Акрамя прэміі на найлепшага маладога гульца ён быў намінаваны на яшчэ дзве: найлепшы гулец свету і найлепшы гулец па версіі фанатаў. Хай не артымаў першыя дзве, але ў яго яшчэ ўсё наперадзе.
Найлепшы трэнер года: Пеп Гвардыёла
Папярэднік: Карла Анчэлоцці
Трэбл. Гэтым усё сказана. Іспанец з кожным годам, як добрае віно, становіцца ўсё лепш.
Найлепшы мужчынскі клуб: «Манчэстэр Сіці»
Папярэднік: «Рэал Мадрыд»
Тут, як і з папярэдняй прэміяй, усё відавочна. Абсалютна дакладна найлепшая каманда мінулага года, якая не заўважала супраціву ад аніводнай каманды. 5 клубных турніраў з пяці добрае таму пацверджанне.
Найлепшы жаночы клуб: «Барселона»
Папярэднік: «Ліон»
ЛЧ, Ла-Ліга і найлепшая футбалістка ў складзе. Ці гэтага недастаткова?
Найлепшы прэзідэнт: Хальдон Аль Мубарак
Папярэднік: Фларэнціна Перэс
Яшчэ адзін прадстаўнік блакітнага Манчэсцера, які прыклаў руку да будавання найлепшага клуба ў свеце. Дастатковая нагода, каб адзначыць высілкі кіраўніка «гараджан».
На гэтым можна было было б скончыць, але мы абяцалі вам незвычайныя намінацыі— вось некалькі з іх:
Найлепшы футбольны агент: Жоржэ Мендеш
Папярэднік: Жоржэ Мендеш
Найлепшы спартыўны дырэктар: Крысціяно Гуінтолі
Папярэднік: Паоло Мальдзіні і Фрэдэрык Массара
Таксама ёсць асобная рубрыка для тых, хто прасоўвае футбол у віртуальнай прасторы: Digital Awards.
Найлепшы лічбавы журналіст:Фабрыцыа Рамана
Папярэднік: Фабрыцыа Рамана
Адказны за большасць інсайдаў у сучасным футболе (пры ўсёй павазе да Ўладзіслава Татура). Без яго мы б пазбавіліся шмат якіх нагодаў для абмяркоўвання.
Найбольш уплывовы футбольны інфлюэнсер: ALNOUFALI_7
Папярэднік: Khaby Lame
Найлепшы кіберфутбаліст:Msdossary7
Папярэднік: TUGA810
Найлепшы відэакрэатар:Asgari_freestyle
Папярэднік: ALNOUFALI_7
Гэтая сціплая дзяўчынка робіць з мячом неверагодныя рэчы. Можаце ўпэніцца самі. І хіджаб ёй зусім не перашкаджае.
Вось так выгладае адна са шматлікіх футбольных прэміяў, у якіх мы з усёй моцы намагаемся не заблытацца. З усімі пазіцыямі згодны?