Вар'яцкі матч у Брэсце: «Мяшкоў» і СКА выдалі валідольную гульню на старце фіналу
Спякотнае супрацьстаянне у пачатку серыі.
Гандбольны чэмпіянат Беларусі падыходзіць да свайго завяршэння – залаты камплект узнагарод разыгрываюць прынцыповыя супернікі з Брэста і Мінска.
Да першага матчу фінальнай серыі СКА падышоў з сумнай статыстыкай з дзевяці паражэнняў запар ад «Мяшкова» – іх апошняя перамога здарылася ў маі 2023-га ў фінале Кубка Беларусі.
Старт гульні для каманды Дзмітрыя Нікуленкава таксама не склаўся – больш за шэсць хвілін яна не магла распячатаць вароты суперніка. «Мяшкоўцы» ж праблем з атакай не адчувалі і хутка павялі з лікам 5:1.
Праўда, затым і напад гаспадароў забуксаваў – падапечныя Эдуарда Какшарава больш за дзесяць хвілін не маглі паразіць браму гасцей, увязваючы ў іх абароне, і дазволілі суперніку зраўняць лік. Сітуацыя не выглядала катастрафічнай толькі дзякуючы намаганням галкіпера «Мяшкова» Дзяніса Забалоціна – у нейкі момант сустрэчы ў яго было 64% (9 з 14) сэйваў.
І ўсё ж гаспадарам удалося арганізаваць невялікі гандыкап, які яны ўтрымлівалі да апошняй дзесяціхвілінкі. На адзнацы 51:43 СКА зраўняў лік – і канцоўка сустрэчы ператварылася ў сапраўднае варʼяцтва!
За пяць хвілін да сірэны правы кутні СКА Яўген Нікановіч арганізаваў імклівы адрыў і ўпершыню ў гэтай сустрэчы вывеў сваю каманду наперад. Але ўтрымаць лідарства ў яго каманды не атрымалася – серыя памылак у нападзе і гераічныя перахопы «мяшкоўцаў», якія заканчваліся галамі Эдуарда Яраша, не заставілі шансаў гасцям.
Брэст атрымаў першую перамогу ў серыі, якая перамяшчаецца ў сталіцу. Другая гульня адбудзецца 20 красавіка.
