Сяргей Стась: «У Расіі добры адбор, добрыя школы, гэтыя хлопцы выдатна катаюцца, выдатна валодаюць клюшкай»
Галоўны трэнер маладзёжнай зборнай Беларусі Сяргей Стась падзяліўся меркаваннем аб матчы са зборнай Расіі U-17 (3:1).
– Гульня складалася няпроста. Супраць нас гуляла вельмі добрая і вельмі хуткая каманда. Нездарма яны абгулялі Расію U-18. Я ведаў, што будзе хуткі, тэхнічны і граматны хакей з боку расіян.
– Чаму ў заяўцы на гульню сёння не было Міраслава Міхалёва, Лорэнса Зінадзіна і Максіма Глінскага, якія гулялі ўчора?
– Міхалёў, на жаль, прыхварэў, а адсутнасць Глінскага тлумачыцца ратацыяй складу. У Зінадзіна таксама праблемы са здароўем.
– Наколькі ўскладніў гульню той факт, што сапернік, які на некалькі гадоў малодшы, быў моцны фізічна?
– Гэта лепшыя хлопцы сваёй краіны, таму я не быў здзіўлены. У Расіі добры адбор, добрыя школы, і вы самі бачылі, што гэтыя хлопцы выдатна катаюцца, выдатна валодаюць клюшкай і маюць добрае разуменне гульні.
– Заўтрашні матч са зборнай Расіі U-18 будзе цяжэй, чым сённяшні?
– У моладзевым хакеі ніколі не ведаеш, як складзецца гульня. Калі нашы хлопцы выканаюць план на гульню, то я думаю, што ўсё магчыма. Але мы ўсе цудоўна разумеем, што проста не будзе, – лічыць Стась.