Міхалёў пасля 0:3 ад Расіі U-20: «З нулём ніхто нічога не выйграе»
Галоўны трэнер «Беларусі 21» Андрэй Міхалёў падзяліўся меркаваннем пра матч з чырвоным складам Расіі U-20 (0:3).
– Пракаментуйце гульню. Што сёння атрымалася, што – не?
– Лiк які? 0:3! Не змаглі забіць гол. З нулём ніхто нічога не выйграе.
– Адна з прычын такога выніку – гэта малая колькасць часу на аднаўленне?
– Напэўна так. Мы позна ўчора гралі. Па арганізацыі гульні мы сёння былі лепшыя, чым учора, у трэцім перыядзе кантралявалі шайбу, але не кідалі. Ёсць добрыя сітуацыі, а мы замест таго, каб кінуць, спрабуем яе яшчэ больш палепшыць. Рабяты так і не зразумелі, што вароты стаяць на адным месцы і трэба ў іх кідаць, а не катацца па кутах.
– Якія станоўчыя моманты можаце адзначыць?
– Паўтаруся, па арганізацыі гульні мы сёння былі лепш, чым учора.
– Ці згодныя, што сёння прайгралі матч на контратаках? Нават калі ўзяць першы гол, дык там менавіта такая гісторыя.
– Так. У тым моманце мы страцілі шайбу. Гэта пытанне канцэнтрацыі і важнасці гульні. Трэба прасцей гуляць, асабліва ў сіняй лініі.
– Прычына адсутнасці Ігнаценкі ў гэтым матчы – гэта ўчорашняе выдаленне да канца гульні?
– Так, ён атрымаў матч-штраф.
– Чаму ў трэцім перыядзе вырашылі замяніць Мікіту Мытніка на Антона Масальскага?
– Таму што Мытнік «наеўся». Сёння вельмі шмат было кідкоў з сярэдняй дыстанцыі, і я не хацеў падстаўляць хлопца.
– Заўтра будзе турнір 3х3. Для вас гэта нешта новае?
– Так, нешта новае. Упершыню ўдзельнічаю ў нечым падобным. Будзем рыхтавацца.
– Як будзеце рыхтавацца?
– Зараз галоўнае - выспацца і добра паесці, – сказаў Міхалёў.