Трэнер «Шахцёра» Чупрыс: «Пачатак другога перыяду – наш найлепшы адрэзак за гэтыя два гады»

– Атрымалі задавальненне ад таго, што ў гэтым матчы праведзеная праца над памылкамі з папярэдняй сустрэчы? Вы тады былі незадаволеныя тым, што прайгравалі барацьбу ў зоне атакі, але сёння шайбу ніхто нікому не аддаваў, а першае выдаленне здарылася толькі ў трэцім перыядзе.

– Пасля першай гульні зрабілі высновы, паглядзелі відэа, разабралі памылкі. Добры другі перыяд атрымаўся, яго пачатак. Напэўна, гэта быў лепшы адрэзак за ўвесь час, за два гады, што я ля руля каманды. Хлопцы – малайцы! І справа нават не ў ліку 7: 0, а ў тым, што гулялі адзін на аднаго, адзін за аднаго, за брамніка. Стараліся не цягнуць коўдру на сябе і самавіта дагуляць матч. Што і атрымалася.

– Матч можна падзяліць на два вялікіх адрэзка: першы перыяд і другі-трэці, дзе для вас шыкоўна склалася гульня. Што такое адбылося ў распранальні пасля першага перыяду, што хлопцы выйшлі і за 5 хвілін 5 шайбаў закінулі?

– Нічога насамрэч не адбывалася. Проста крыху падкарэктавалі тое, што не атрымлівалася. Былі добрыя контратакі ў першым перыядзе, але мы не змаглі іх рэалізаваць. Калі б рэалізавалі нават не ўсе моманты, а частка, то было б па-іншаму. Але самае галоўнае – хлопцы пачулі.

У першым перыядзе супернік рухаўся выдатна, але мы адзін аднаго выдатна ведаем – хто ў што гуляе. Сёння нам дапамаглі рэалізацыя плюс характар. Каманда – малайцы!

– Не магу не спытаць па персаналіях. Зразумела, што Шалагін і Еркін як быццам у асобнай лізе гуляюць. Ці чакалі такой выніковасці ад звяна, дзе Сяргееў і Вярэніч?

– У першую чаргу – камандная праца. Усё роўна, хто ў дадзены момант забівае. Самае галоўнае – каб кожны выканаў тое, што прынясе карысць камандзе. Сёння так атрымалася, што спрацавалі не толькі першыя два звяны, але выдатна згулялі і трэцяе, і чацвёртае: трымалі шайбу, у ціск беглі, трымалі барацьбу. Ніколі не кажу, што ўсё добра, заўсёды ёсць над чым працаваць, і мы будзем працягваць гэта рабіць, – сказаў Чупрыс.