Сяргей Пушкоў: «Адкуль «Брэст» чэрпае сілы? Не скажу, няхай гэта будзе сакрэтам нашай каманды»
Галоўны трэнер «Брэста» Сяргей Пушкоў пракаментаваў першы матч з «Шахцёрам» АТ (4:5) у серыі плэй-оф Экстралігі.
– Які выдаліўся ў авертайме Вераменка сыходзіў з лёду са слязамі на вачах. Менавіта яго выдаленне прывяло да закінутай шайбы. З чым звязаны такія эмоцыі ў хакеіста?
– Усе змагаюцца за шайбу, таму і здарылася гэтае выдаленне. Але серыя пачалася цудоўна, вы ўсё гэта бачылі. Шмат закінутых шайб, адзінае - мы крышку не дацярпелі. А апошнія 10 хвілін трэцяга перыяду аддалі ініцыятыву, гаспадары рэалізавалі свае моманты за кошт нашых памылак.
– Чаму не ўдалося дацярпець пры ліку 4:2?
– Проста дапусцілі памылкі ў абароне, менавіта па гэтай сітуацыі не выканалі гульнявое заданне: усе апынуліся ў абароне, але супраць гульца, які атакаваў вароты, ніхто не згуляў.
– Ці здзівіў вас «Шахцёр»?
– Нічым не здзівіў, мы бачылі, як яны гуляюць, рыхтаваліся да гэтых матчаў, для нас нічога новага не было.
– Як ацаніце падмацаванне з «Дынама» у асобе Іллі Сушко?
– Мы чакалі, калі ён зможа дапамагчы нам, ёсць у нас пэўныя праблемы з абаронцамі.
– Дзе «Брэст» чэрпае сілы?
– Не скажу, хай гэта будзе сакрэтам нашай каманды, - сказаў Пушкоў.
