Расійская журналістка Яньшына: «Астапчук захварэла падчас зняволення, але нават у такім стане, лежачы на падлозе, закрывала сабой людзей ад скразняку»
Расійская журналістка Кацярына Яньшына, знаходзілася на Акрэсціна з 5 па 20 студзеня, распавяла, што чула ад сваіх сукамерніц пра тое, у якіх умовах у той час сядзела экс-лёгкаатлетка і прызёрка чэмпіянату Еўропы Надзея Астапчук.
Нагадаем, пра затрыманне Астапчук стала вядома 15 снежня 2022 года. Прычыны дагэтуль невядомыя.
– Калі Кацярына была на ЦІПе, ёй расказвалі, што Астапчук знаходзілася ў ІЧУ Акрэсціна. У ЦІП вельмі спякотна, а ў ІЧУ, наадварот, дужа холадна.
Паводле сукамерніц Кацярыны, спартсменка захварэла падчас зняволення, але нават у такім стане, лежачы на падлозе, закрывала сабой людзей ад скразняку, – гаворыцца ў матэрыяле «Нашай Нівы».
Адзначым, што Астапчук з'яўляецца сярэбранай прызёркай ЧС-2003, а ўзнагароды з Алімпійскіх гульняў (залаты медаль АГ-2012 і бронзавы АГ-2008), а таксама чэмпіянатаў свету забралі за допінг, знойдзены ў спартсменкі.