Сейм Літвы прыняў рэзалюцыю пра забарону ўдзелу расіян і беларусаў на Алімпіядзе-2024
Сейм Літвы прыняў рэзалюцыю пра забарону ўдзелу расійскіх і беларускіх спартоўцаў на Алімпіядзе-2024 і іншых міжнародных спаборніцтвах.
Літоўская шахматыстка, а цяпер спікер Сейма Вікторыя Чмілітэ-Нільсэн паведаміла, што рашэнне было прынята аднагалосна.
«Для прадстаўнікоў краін-агрэсараў не можа быць нейтральнага сцяга, пакуль ідзе жорсткая вайна Расіі ва Украіне», – дадала яна.
Нагадаем, што многія беларускія каманды і спартсмены былі адхіленыя ад міжнародных спаборніцтваў у адказ на вайну, якая з 24 лютага 2022 года працягваецца Расiяй ва Украіне з выкарыстаннем тэрыторыі Беларусі.
25 студзеня МАК дапусціў магчымасць зняцця адхілення на строгіх умовах, сярод якіх удзел у спаборніцтвах толькі ў нейтральным статусе і адсутнасць у біяграфіі «актыўнай падтрымкі» вайны ва Украіне.
