Аляксандр Апейкін: «Актыўная грамадская пазіцыя беларусаў стала прыкладам адказнасці атлетаў перад грамадствам за падтрымку»

Выканаўчы дырэктар Беларускага фонду спартыўнай салідарнасці Аляксандр Апейкін падзяліўся думкамі пра тое, як паўплываў беларускі спартыўны рух пасля выбараў-2020 на міжнародны спорт.

«Апошнім часам мала дзяліўся ўласнымі думкамі пра спорт. Не праз то, што не было чым дзяліцца, але з пачатку красавіка ўвайшоў у сапраўдны працоўны штурм (візіт у ЗША, канферэнцыя Athletes For Peace and Freedom у Таліне, гуманітарны праект у падтрымку Украіны, чарговы візіт у Кіеў). У такім рытме часам бывае не да рэфлексіі.

Сёння, зрабіўшы невялікую стратэгічную паўзу і ў рэтраспектыве дэтальна разглядзеўшы падзеі, якія адбыліся за апошнія тры гады, быў уражаны смеласцю і маштабам. Магу ўпэўнена сцвярджаць, што рух беларускіх атлетаў змяніў сусветны спорт. Дакладна там стала меней месца для цынізму і прагматызму, і ўсё болей месца для чалавечых каштоўнасцяў, праўды і здаровага розуму. Працэс нялёгкі, але ён распачаўся і няспынна ідзе ў патрэбным кірунку.

Антываенная дэкларацыя, якую мы распрацавалі, сёння становіцца асноўным прынцыпам для ўдзелу атлетаў з касты «мяне гэта не датычыцца». А розным Z-дэгенератам і ўвогуле больш няма месца ў спартыўнай сям'і. Актыўная грамадская пазіцыя беларускіх атлетаў у пытаннях ваеннай агрэсіі супраць Украіны і парушэння правоў чалавека ў Беларусі стала сусветным прыкладам адказнасці атлетаў перад грамадствам за шматгадовую любоў і падтрымку. Атлеты не могуць быць «па-за палітыкай», яны лідары меркаванняў і ў гэтым іх сацыяльныя місія і адказнасць.

Канешне, за гэтыя тры гады не ўсё было ідэальна. Былі спрэчкі і рознагалоссі, выгаранне і стомленасць, гучныя заявы і непаразуменні. Гэта нармальны грамадскі працэс, так уладкаваны людзі. Але былі і моцныя кампаніі, сапраўдныя эфектыўныя аплявухі хунце лукамора, узорная кансалідацыя і арганізаванасць, праца на 200% сваіх унутраных магчымасцяў. Як бы там ні было, у гэтым працэсе паўстала і загартавалася плынь моцных лідэраў спорту, якія ўжо змянілі не толькі Беларусь, але і свет. Прынамсі, спорт стаў тым тонкім мосцікам, які даў шанец на захаванне добразычлівых адносін паміж беларускім і ўкраінскім народамі ў будучыні», – напісаў Апейкін.