Пуцін абвінаваціў МАК у расізме і дыскрымінацыі
Уладзімір Пуцін на адкрыцці форуму «Расія – спартыўная дзяржава» ў Пермі заявіў, што Алімпійскія гульні выкарыстоўваюцца як інструмент этнічнай дыскрымінацыі. Так Пуцін адрэагаваў на нядопуск расійскіх спартоўцаў да міжнародных спаборніцтваў.
«Дзякуючы некаторым кіраўнікам сучаснага Міжнароднага алімпійскага камітэта мы даведаліся, што запрашэнне на Гульні – гэта не безумоўнае права лепшых спартсменаў, а нейкі прывілей і заслужыць яе можна не спартыўнымі вынікамі, а нейкімі палітычнымі жэстамі, якія да спорту наогул не маюць ніякага дачынення», – заявіў Пуцін, адзначыўшы, што гэта раўнасільна «грубай расісцкай і этнічнай дыскрымінацыі» (на самой справе этнічнай дыскрымінацыі няма, бо шмат этнічных рускіх выступаюць за іншыя краіны – Tribuna.com).
Прэзідэнт Расіі таксама падкрэсліў, што дзяржава будзе падтрымліваць тых спартсменаў, якія «з-за абмежаванняў правоў і свабод» вымушаны прапускаць міжнародныя спаборніцтвы.
Нагадаем, што 28 сакавіка 2023-га МАК аб'явіў, што рэкамендуецца дапускаць да міжнародных спаборніцтваў беларускіх і расійскіх індывідуальных атлетаў у нейтральным статусе, калі такія спартсмены не дапускалі «актыўнай падтрымкі» вайны ва Украіне, а таксама не маюць кантракта з ваеннымі або сілавымі ведамствамі Беларусі ці Расіі.
