Жанаты мужчына быў з Сабаленкай у Штутгарце, а цяпер ён з ёй у Мадрыдзе – яму можна класці руку ніжэй за яе талію
Вернік з дзіўнай тату.
На мінулым тыдні мы распавядалі, як Арына Сабаленка на адзін з трэнінгаў у Штутгарце, дзе праходзіў турнір WTA, прыехала ў кампаніі мужчыны. Ён спачатку чакаў, пакуль спартсменка адпрацуе занятак, а потым яны разам сышлі ў абдымку. Спадарожнікам другой ракеткі свету ў той дзень аказаўся Фабіяна Дзанэці Маньяні – качок і прадпрымальнік, які жыве ў Бразіліі і зʼяўляецца саўласнікам кампаніі Oakberry, чыя спецыялізацыя – нібыта карысная ежа. Вось тут мы падрабязна расказвалі і пра сутнасць бізнесу, і пра некаторыя факты з біяграфіі Маньяні.
У Штутгарце падпісантка за рэпрэсіі вылецела ў чвэрцьфінале. Сёння яна ўжо знаходзіцца ў іншым горадзе – Мадрыдзе, дзе стартавала кваліфікацыя іншага буйнога турніру. Арганізатары выклалі ў сябе ў сацсетках відэа з прыездам Сабаленкі. За што чапляецца ваша вока?
Нашае зачапілася за тое, што нейкі мужчына паклаў руку на месца, што размешчана ніжэй таліі – і тэнісістка ніяк на гэта не адрэагавала.
І хто ж гэты нахаба? Адразу скажам, што ён звязаны з кампаніяй Oakberry, але гэта – не Маньяні.
Гэты персанаж ужо фігураваў побач з Сабаленкай, але адразу яго апазнаць не ўдалося. Турнір у Штутгарце выкладаў ролік, як тэнісістка заязджала ў гатэль.
З ёй з машыны тады выйшаў мужчына з вельмі характэрнымі татуіроўкамі.
А цяпер гляньце на руку таго, абдымае спартсменку ў Мадрыдзе – так, гэта адзін і той жа чалавек. Што за ён?
Ужо другі раз на публіцы (Штутгарт, Мадрыд) Сабаленку суправаджае Георгіас Франгуліс. Яму 34, і ён, як і Маньяні, таксама сузаснавальнік Oakberry. Сабаленка з пачатку гэтага года зʼяўляецца рэкламным тварам фірмы.
Пра Франгуліса ў асноўным вядома тое, што ён сам пра сябе распавёў сем месяцаў таму ў інтэрвʼю бразільскаму Forbes – выданне зацікавіў бізнес на здаровым харчаванні. Прадпрымальнік мае грэчаскія карані. Вучыўся ў Бразіліі ва ўніверсітэце на юрыста, аднак не стаў здаваць іспыты і дамагацца дыплома – проста вельмі хацеў узяцца за ўласную справу. Дзеля гэтага пераехаў у Маямі (сёння там як раз жыве Сабаленка), спрабаваў займацца нерухомасцю, але затым звярнуў увагу на цікавасць амерыканцаў да здаровай ежы – і пераключыўся на гэты кірунак. Сёння Oakberry – гэта і ўласныя кропкі продажаў, і франшыза. Геаграфія – Аўстралія, Іспанія, Партугалія, ЗША, Саудаўская Аравія і іншыя краіны.
Пераломным Франгуліс называе 2016 год. Расказвае, што ў жніўні лекар звярнуў увагу на буйны лімфавузел і дыягнаставаў рак шчытападобнай залозы. У кастрычніку Франгуліс справіў вяселле, а праз два тыдні паспяхова перанёс аперацыю. Ну а 6 снежня адкрыў першы пункт продажу.
Мужчына займаецца аўтамабільнымі гонкамі – у Бразіліі ўдзельнічае ў Кубку выкліку «Поршэ» (беларуска як раз марыць пра такую машыну) у якасці пілота. Калі верыць спецыялізаваным сайтам, у яго здараліся і перамогі, і подыумы.
Сацсеткі Франгуліса відавочна цікавяць Сабаленку – яна адлайкала там усе пасады, якія зʼявіліся пасля 26 мая 2023 года. Першае фота без рэакцыі спартсменкі, калі ісці назад, – тое, на якім прадпрымальнік сфатаграфаваны з жонкай. Здымак падпісаны: «Дзень самага прыгожага сэрца, дзень кахання ўсяго майго жыцця».
Франгуліс нібыта часта ходзіць у царкву, бо лічыць карысным размаўляць з Богам. На целе мужчыны шмат татуіровак – у асноўным, на рэлігійную тэматыку. На грудзях і на спіне – распяцці. На біцэпсе правай рукі – надпіс «Змагайся за нас, воін святы Георгій», на яе перадплеччы – «Гасподзь – мой пастыр, і я не буду мець патрэбу». На левай выбіты, як кажа Франгуліс, яго галоўны дэвіз – Ora et Labora («Маліся і працуй» – формула ад бенедыктынцаў). У раёне сэрца на нямецкай мове зроблены надпіс «Ойча наш». Зрэшты, калі яшчэ раз зірнуць на руку са скрына мадрыдскага відэа, то можна адшукаць яшчэ адну дасылку да Нямеччыны.
У некаторых субкультурах з дапамогай лічбаў 88 шыфруецца нацысцкае вітанне. Лічбы азначаюць парадкавы нумар першых літар слоў вітання ў англійскім алфавіце. Зрэшты, мы не бярэмся сцвярджаць, што Франгуліс хацеў сказаць сваёй татуіроўкай. Як і цяжка зразумець, якія адносіны сёння яго звязваюць з Сабаленкай.
