Міхаіл Ботнікаў: «Украіна вылучыла ультыматум: альбо мы, альбо яны. BSWW пайшла нам насустрач – дазволіла выступаць беларусам пад дзяржсімваламі»
Намеснік старшыні АБФФ Міхаіл Ботнікаў выказаў словы падзякі Міжнароднай Федэрацыі пляжнага футбола (BSWW) за допуск зборнай Беларусі да міжнародных спаборніцтваў.
«Як вядома, медаль мае два бакі. З адной – гэта дрэнна, калі адсутнічае магчымасць гуляць на міжнародных турнірах. Вопыт, які набываецца на такіх турнірах, у матчах супраць грандаў сусветнага футбола – неацэнны. Але, дзякуючы падтрымцы Федэрацыі футбола і Міністэрства спорту, нам удалося захаваць трэніровачны працэс, мы праводзілі дастатковую колькасць таварыскіх паядынкаў як з расійскімі клубамі, так і нацыянальнымі зборнымі, выязджалі на вучэбна-трэніровачныя зборы, таму нам удалося падтрымліваць дастаткова добры ўзровень гульцоў.
З іншага боку, хлопцы вельмі засумавалі, гэта было бачна па камандзе. Як яны сябе адчувалі, як яны сябе паводзілі, якія ў іх былі эмоцыі на зборы ў Баку перад адборачным турнірам да Чэмпіянату свету. Цяпер таксама ўсе былі натхнёныя. Мы ўдзячныя Міжнароднай Федэрацыі пляжнага футбола (BSWW) за тое, што яна прыняла такое рашэнне ў гэты складаны час, дазволіўшы зборнай Беларусі выступаць на спаборніцтвах, захаваўшы гімн і сцяг, што таксама немалаважна. Яны захавалі нашы дзяржаўныя сімвалы, гэта ўдвая прыемна. Хочацца адзначыць, што зборная Украіны вылучыла ультыматум: альбо мы, альбо яны. І BSWW пайшла нам насустрач, дазволіўшы беларусам выступіць», – сказаў Ботнікаў.
Нагадаем, у адказ на вайну, якая з 24 лютага 2022-га працягваецца Расіяй ва Украіне з выкарыстаннем тэрыторыі Беларусі, МАК 28 лютага 2022-га апублікаваў рэкамендацыю адхіліць прадстаўнікоў Расіі і Беларусі ад міжнародных спаборніцтваў, як i зрабiла большасць сусветных федэрацый па відах спорту.
28 сакавіка 2023-га МАК абвясцiў, што з гэтага моманту рэкамендуе дапускаць да міжнародных спаборніцтваў беларускіх і расійскіх індывідуальных атлетаў у нейтральным статусе, калі такія спартсмены не дапускалі «актыўнай падтрымкі» вайны ва Украіне, а таксама не маюць кантракта з ваеннымі або сілавымі ведамствамі Беларусі ці Расіі.
