Пісарэнка пра лігу клубнага біятлона: «Беларусы сезонна будуць ездзіць у расійскую глуш, дзе будуць зарабляць»

«Галаданне пакуль, відаць, не пагражае беларускім біятланістам. Яны ўзялі медалі на Кубку Лігі легендарнага клубнага біятлона. Гэта новае спаборніцтва, якое прыдумала Расія з Беларуссю.

І быццам нічога асаблівага там няма, акрамя памераў прызавых. Амаль 2800 долараў ужо за трэцяе месца ў гонцы, за другое 5500 долараў, за першае крыху больш за 11000 долараў.

Для параўнання на этапах Кубка свету першае месца – гэта крыху больш за 16000 даляраў.

І вось пасля гэтага турніру Ганна Сола і Антон Смольскі зарабляюць па 16500 долараў. У іх сінхроннае золата ў гонцы пераследу і другое месца ў мас-старце.

Вельмі прыкольна, што абодва адразу пачалі казаць пра грошы. Гэта ўжо нейкая новая дысцыпліна атрымоўваецца. Апроч таго, што трэба думаць пра язду, пра стральбу, у галаве яшчэ трэба пракручваць думкі, колькі там прызавых за якое месца. Гэта ўжо не біятлон, гэта трыятлон нейкі, не?

Беларускія біятланісты на фоне расійскіх вельмі нават нядрэнна выглядаюць. Нават калі вяртаюцца ў спорт пасля родаў. І для іх гэтыя спаборніцтвы проста класная магчымасць зарабіць. Вось проста ўсё казалі пра бабкі.

Гэта табе не чэмпіянат свету, дзе ёсць канкурэнцыя і змагацца за прызавыя вельмі складана. Тут прыехаў сабе, спакойненька пакатаўся, яшчэ і нядрэнна зарабіў. Ведаеце, у мяне такая асацыяцыя, што біятланісты беларускія зараз будуць як вахтавікі.

Сезонна будуць адпраўляцца на пару месяцаў у расійскую глуш, дзе будуць зарабляць бабкі.

У існуючых абставінах для іх, магчыма, гэта будзе фінансава больш выгадна, чым паездкі на чэмпіянаты свету. Магчыма», – сказаў Пісарэнка.

Нагадаем, што IBU адхіліла прадстаўнікоў Беларусі ад спаборніцтваў пад сваёй эгідай у адказ на вайну, якая з 24 лютага 2022 года працягваецца Расіяй ва Украіне з выкарыстаннем тэрыторыі Беларусі.