Пакуль муж Яблонскі без працы, Козел знайшла новую «прафесію» – цяпер разумее «дурныя рашэнні» трэнераў
Прайшла ненавуковы курс за тысячу долараў.
28-гадовы паўабаронца Яўген Яблонскі, капітан зборнай Беларусі пры Георгіі Кандрацьеве, Карласам Алосам нават не выклікаецца. Гэта лагічна – прарэжымны падпісант так і не знайшоў новы клуб пасля ліпеньскага растання з «Арысам», у складзе якога ўзяў золата чэмпіянату Кіпра. Хоць інсайды казалі пра наяўнасць у гульца варыянтаў у Грэцыі, Расіі, Венгрыі, Босніі і Сербіі, пакуль нічога з гэтага не ўвасобілася ў жыццё.
А пакуль у Яблонскага паўзы ў выхадах на поле, у яго жонкі Крысціны Козел такі ж перыяд у выхадах відэа на YouTube. Экс-вядучая дзяржТБ у апошні час рабіла свой чарговы праект аб футболе, але самае свежае відэа датаванае 3 жніўня – гэта быў рэпартаж з кіпрскага матча Лігі канферэнцый паміж мясцовым АЕК і «Тарпеда-БелАЗ».
Але, здаецца, Козел знайшла іншы спосаб, як зарабіць, пакуль муж у прастоi. Гаворка пра нумаралогію – інтэрпрэтацыю чыслаў, якія знаходзяць у даце нараджэння і не толькі, для «дыягностыкі» характару чалавека, «прадказвання» будучыні і таму падобнага.
Пра захапленне Козел мы даведаліся дзякуючы таму, што ў Instagram яна з'явілася ў жывым эфіры ў Instagram у Наталлі Скубковай. Жанчына пазіцыянуе сябе як спецыяліста па нумаралогіі, у яе 22 тысячы падпісчыкаў і, як яна сцвярджае, больш за чатыры тысячы кліентак. Так, указаны менавіта жаночы пол – і відэа ў профілі Скубковай накіраваныя яўна на жаночую аўдыторыю. Збіраюць ролікі па некалькі тысяч праглядаў – быў толькі адзінкавы прарыў на шырокую аўдыторыю з відэа з загалоўкам пра «найлепшых палюбоўнікаў».
Як аказалася, спачатку жонка падпісанта звярнулася па кансультацыю, на якой Скубкова, паводле слоў Козел, па датах расказала тое, чаго ніяк не магла ведаць пра Крысціну. Уражаная экс-вядучая замовіла яшчэ дзве кансультацыі, у тым ліку індывідуальную для Яблонскага. Кожную трэба было чакаць (Скубкова заяўляе пра моцную загружанасць), а таксама выдаткоўваць 160 долараў – за гэтыя грошы прымяняюцца «інструменты коўчынга і метафарычныя карты».
Пасля гэтага Козел вырашыла, што прасцей не марнаваць грошы на кансультацыі, а самой стаць «нумеролагам». Для гэтага былая тэлевядучая запісалася на навучанне ў Скубковай, замовіўшы «прэміум» – за асабістае «куратарства» жанчыны трэба было выкласці амаль тысячу долараў.
Скубкова падчас эфіру хваліла Козел як вучаніцу і расказвала, што з нецярпеннем чакала хатнія заданні ад яе. Крысціна ж расказала, што думала пра прымяненне новых «звестак» у футболе.
– Цікава глядзець на футбалістаў. Маладая зорачка нейкая ўзыходзіць, я паглядзела дату [нараджэння] – і ўжо разумею, пры якіх абставінах, пры якіх крытэрыях яна будзе развівацца лепш, што ёй можа дапамагчы, – заявіла Козел.
Таксама Козел заявіла, што больш не задаецца пытаннямі пра паводзіны коўчаў – ёй таксама ўсё тлумачаць нейкія чыслы (магчыма, так зручна распісаць і раставанне «Арыса» з Яблонскім).
– Вось я гляджу на якога-небудзь трэнера і думаю: «Божа, чаму ён такі гаварлiвы? Чаму ён прымае такія дурныя, на мой погляд, рашэнні?». Цяпер я гэта для сябе ўжо разумею. Я гэта яшчэ не нясу ў масы, але вельмі многія рэчы становяцца зразумелымі, – сказала экс-вядучая.
Што ж, магчыма, Козел яшчэ саспее для чарговага YouTube-праекта, у якім будзе тлумачыць паводзіны людзей з белфутбола іх датай нараджэння ці яшчэ чым-небудзь гэтакім. Нам жа застаецца нагадаць, што нумералогія – ілжэнавука: ні адзін з навуковых эксперыментаў не змог пацвердзіць нейкай сувязі паміж характарамі і лёсамі людзей з іх датамі нараджэння, імёнамі і гэтак далей.
