«Сіці» ўзяў АПЛ чацвёрты раз запар – упершыню ў гісторыі лігі: фанаты на полі, Эдэрсан з віном і спакойны Пеп
Выйгралі юбілейнае дзясятае чэмпіёнства.
«Манчэстэр Сіці» ў апошнім туры не здзівіў – выканаў сваю частку працы, выйграўшы 3:1 у «Вест Хэма», і на хатнім стадыёне забяспечыў чэмпіёнства АПЛ.
• Адразу пасля фінальнага свістка на поле выбеглі заўзятары – у вялікай колькасці:
Надпіс і аб'ява «Калі ласка, неадкладна пакіньце поле» ў такія моманты, вядома, значаць мала.
Праз гэта футбалістам з фінальным свістком прыйшлося літаральна ўцякаць за сцюардаў – у мэтах бяспекі:
Пеп сустрэў фінальны свісток спакойна – простым поціскам рукі:
Першыя эмоцыі з падтрыбункі.
У распранальні таксама святкавалі.
Трафей на цырымонію ўзнагароджання вынес Пол Дзікаў – былы форвард «Сіці», знакавы для клуба.
Кевін Дэ Бруйнэ тым часам трымаў бутэльку шампанскага, Эдэрсан дапіваў віно.
Пеп атрымлівае чарговы чэмпіёнскі медаль.
Калі сюды дадаць фатаграфіі ўсіх футбалістаў у момант атрымання медалёў, мы ўзламаем сайт – таму пакінем толькі таго, каго прызналі найлепшым не толькі ў камандзе, але і ва ўсёй АПЛ гэтага сезону. Вось ён – Філ Фодэн, выхаванец і заўзятар «Сіці», для якога гэта ўжо шосты тытул. У вырашальным матчы менавіта ён аформіў дубль.
І Родры – футбаліст, які паставіў кропку ў сезоне і, здаецца, не ўмее прайграваць. Фізічна.
Момант узняцця трафея.
• Для «Ман Сіці» гэта дзясятае чэмпіёнства ў гісторыі англiйскага футбола – па гэтым паказніку «гараджане» абышлі «Эвертан», у якога дзевяць трафеяў. Больш толькі ў «Арсенала» (13), «Ліверпуля» (19) і «МЮ» (20).
У эпоху АПЛ гэта восьмы трафей – усе яны адбыліся ўжо ў эпоху арабскіх шэйхаў. Больш толькі ў «МЮ» – 13.
• «Сіці» ўзяў чэмпіёнства ў чацвёртым сезоне запар! У гісторыі англійскага футбола гэта не ўдавалася нікому – максімум былі серыі з трох чэмпіёнстваў запар.
Апошнім і адзіным у эпоху АПЛ гэта рабіў «МЮ» – у 1998-2001 і 2006-2009 гадах.
Адпаведна, Пеп Гвардыёла – першы трэнер, якому гэта ўдалося.
• У цэлым для Пепа гэта 12-е чэмпіёнства – толькі як для трэнера. Тройчы браў Ла Лігу з «Барсай», тройчы Бундэслігу з «Баварыяй» і шэсць разоў АПЛ з «Сіці».
• Дамінацыю падкрэслівае і тое, што прадстаўніка «Сіці» прызналі найлепшым гульцом сезона АПЛ 5-ы год запар. Сёлета ім стаў Філ Фодэн, да гэтага прыз атрымлівалі Эрлінг Холанд, Кевін Дэ Бруйнэ (двойчы) і Рубэн Дыяш.
• Акрамя таго, «Сіці» яшчэ і мае серыю без паражэнняў з 35 матчаў ва ўсіх турнірах – 29 перамог і 6 нічыіх. Ні адной камандзе АПЛ менавіта ў эпоху гэтага турніру гэта не ўдавалася.
• Найлепшым бамбардзірам «Сіці» і ўсёй лігі стаў Эрлінг Холанд – забіў 27 галоў у чэмпіянаце.
А вось найлепшы асістэнт клуба – Кевін Дэ Бруйнэ – аддаў толькі 10 галявых перадач, што стала трэцім вынікам у АПЛ.
• Напрыканцы нагадаем, што ўсё яшчэ не закрытая справа аб магчымым парушэнні «Манчэстэрам Сіці» фінансавых правілаў АПЛ, па якіх клубу высунулі 115 абвінавачванняў за перыяд 2009-2018 гадоў – яшчэ ў лютым 2023-га.
Слуханні па справе адбудуцца ў кастрычніку 2024-га, «Сіці» адмаўляе ўсе абвінавачванні.