Да Шкурына цікавасць у клуба Серыі А, якi меціць у ЛЧ, але ці падыходзіць ён беларусу – ёсць пытанні
Не патрапіць бы ў сітуацыю Марозава.
15 сакавіка Tribuna.com стала вядома, што беларус Ілля Шкурын зацікавіў «Балонню» з Серыі А. Форвард польскай «Сталі» з Мелеца ў гэтым сезоне чэмпіянату Польшчы вельмі добры – 12 мячоў і 5 асістаў у 24 матчах. Прэзідэнт клуба Яцэк Клімек раней казаў, што на гульню Шкурына прыязджалі прадстаўнікі двух клубаў з топ-5 ліг – відавочна, адзін мы ўжо ведаем. А сума продажу для такіх чэмпіянатаў зусім невялікая.
А ці патрэбны такі пераход самому Шкурыну і як наогул гуляе італьянскі клуб? «Трыбуна» прааналізавала сітуацыю.
У «Балонні» з аднайменнага абласнога цэнтра на амаль 400 тысяч чалавек на поўначы Італіі слаўная гісторыя – клуб заснаваны ў 1909 годзе і сем разоў выйграваў чэмпіянат краіны. Праўда, буйныя поспехі былі вельмі даўно – апошнія медалі каманда брала ў 1967-м, а Кубак краіны ў 1974-м. У нашым стагоддзі «Балоння» амаль заўсёды была аўтсайдарам Серыі А і двойчы нават вылятала. У 2014-м, пасля другога паніжэння ў класе, кантроль над клубам узяў сын італьянскага мільярдэра, канадскі бізнесмен Джоўі Сапута. «Балоння» адразу ж змагла вярнуцца, але далей зноў змагалася за выжыванне ў эліце, увесь час трымаючыся ў другім дзясятку каманд.
Сапута ў першую чаргу думае пра мінімізацыю страт, уласцівых італьянскаму футболу ў цэлым, так што ў «Балонні» адна з самых малых зарплатных ведамасцей у лізе, затое ў клубе шмат працавалі над прыцягненнем гледачоў. У цяперашнім сезоне на «Балонню» ходзіць па 25 тысяч чалавек – рэкорд з сезона-2000/01. Але аўдыторыю відавочна цешаць не толькі матчдэі.
У першых пяці турах Серыі А-2022/23 «Балоння» ні разу не выйграла, пасля чаго клуб звольніў сербскага трэнера Сінішу Міхайлавіча (у перыяд супрацоўніцтва з 2019-га «Балоння» цярпліва чакала, пакуль трэнер лячыўся ад анкалогіі, але ў канцы 2022-га Міхайлавіч памёр). У верасні 2022-га каманду ўзначаліў 40-гадовы Тыяга Мота – бразілец з італьянскімі каранямі, вялікім досведам гульні на высокім узроўні («Барселона», «Інтэр», «ПСЖ», зборная Італіі) і 16-м месцам італьянскай эліты-2021/22 у якасці галоўнага трэнера «Спецыі». Але ў «Балонні» у Моты пайшло лепш – у першым сезоне ён хутка падняў каманду ў сярэдзіну табліцы, у выніку заняўшы 9-ы радок. А ў цяперашнім «Балоння» пасля першага круга апынулася на пятым месцы, потым выдала серыю з шасці перамог запар – і цяпер трымаецца чацвёртай. «Рома» і «Аталанта» адстаюць ненашмат, але Ліга чэмпіёнаў для «Балонні» рэальная як ніколі.
Мота (злева) і Джошуа Зіркзее
Мота будуе свой футбол на актыўным прэсінгу, кантролі мяча і кароткім пасе. Па сярэднім працэнты валодання (57,8) «Балоння» ў цяперашняй Серыі А саступае толькі «Напалі», па працэнты паспяховых пасоў (86,1) ідзе чацвёртай. Пры дзеяннях у атацы па колькасці кароткіх перадач за матч «Балоння» другая з пачатку, доўгіх – чацвёртая з канца, кросаў – наогул апошняя.
Звычайна каманда гуляе па схеме 4-1-4-1, але Моту не патрэбны форвард у звыклым разуменні. Уся атакуючая гульня «Балонні» – на флангах паўабароны, яна перадапошняя ў італьянскай эліце як па выкарыстанні цэнтра, так і па актыўнасці ў фінальнай трэці поля. На пазіцыі адзінага нападаючага ў асноўным выкарыстоўваецца 22-гадовы нідэрландзец Джошуа Зіркзее, якога эксперты па тактыцы называюць «ілжывай дзявяткай» – ён шмат рухаецца па ўсёй лініі і, калі трэба, без праблем апускаецца да цэнтра поля. Зіркзее аформіў 10 мячоў і 4 асістаў за 27 матчаў Серыі А – ён галоўны бамбардзір «Балонні». Вось, напрыклад, 27 студзеня ў матчы супраць «Мілана» нідэрландзец рушыў на фланг і амаль арганізаваў гол партнёру, але ў выніку мяч вярнуўся да Зіркзее – і ён з вострага кута забіў сам (адзнака 0:27).
3 снежня Мота пакуль адзіны раз пакінуў Зіркзее ў запасе – з «Лечэ» на поле са старту выйшаў 24-гадовы суайчыннік Сідней ван Хойданк. Той гуляў як рэальны форвард – увесь час знаходзіўся наперадзе і адкрываўся за спіны абаронцам. Вынік – нязвыклае для «Балонні» становішча прывяло да праблем з кантролем мяча пры ўсяго адным удары ў створ. На 58-й хвіліне ван Хойданка памянялі на Зыркзее – каманда тут жа стала нагадваць саму сябе і праводзіць небяспечныя атакі ў звыклым стылі (забілі, праўда, толькі са штрафнога).
Пасля нідэрландца ў бамбардзірах «Балонні» ідуць паўабаронцы – 27-гадовы італьянскі правы вінгер Рыкарда Арсаліні аформіў 9+2, 24-гадовы гулец цэнтра поля шатландзец Льюіс Фергюсан – 6+3, яго 21-гадовы калега па пазіцыі Джавані Фабіян – 5+2. Увогуле, форвард клубу патрэбен толькі для патэнцыйнай замены Зiркзее, відавочнага кандыдата на трансфер у блiжэйшае акно, – прыярытэтнае права выкупу за 40 мільёнаў еўра захоўвае «Баварыя», якая прадала гульца «Балоннi» улетку 2022-га за 8,5 млн. Ван Хойданк пакуль сышоў у арэнду ў «Норвіч» з англiйскага Д2. У арэндзе ў «Інтэры» 34-гадовы форвард з Аўстрыі Марка Арнаутавіч, але ў ягоным выпадку ўжо спрацавалі ўмовы, якія абавязваюць міланцаў улетку выкупіць гульца за 8 млн еўра.
Аднак «Балоння» ужо падабрала пару варыянтаў. 15 сакавіка Зіркзее прапускаў матч Серыі А з «Эмпалі» з-за невялікага пашкоджання. У аснове замест яго выйшаў 24-гадовы датчанін Енс Одгар, якога 1 лютага ўзялі ў арэнду з нідэрландскага АЗ з правам выкупу. За першыя два матчы, у якіх выходзіў на замену Зіркзее, Одгар забіў два мячы – нетыповых для «Балонні»: уцёк з цэнтра поля пасля памылкі суперніка плюс замкнуў рэдкі прастрэл. Супраць «Эмпалі» датчанін нанёс чатыры ўдары, але беспаспяхова.
На 72-й хвіліне яго замянілі на 19-гадовага аргенцінца Сант’яга Кастра – увосень ён забіў шэсць разоў у 14 матчах за родны «Велес Сарфілд», і італьянцы купілі форварда за 12 мільёнаў еўра. З «Эмпалі» для яго быў другi выхад на поле за новы клуб. Кастра паспеў нанесці адзін удар.
Выратаваў «Балонню» выхад Фабіяна на 79-й. Праз пяць хвілін каманда правяла атаку ў сваім стылі, але пасля шыкоўнай распасоўкі ўдар Фабіяна пацягнуў варатар (адзнака 1:54).
А на 94-й Фабіян усё ж з дабівання адправіў мяч у сетку і прынёс «Балоннi» гасцявую перамогу 1:0. Па статыстыцы ўсё было тыпова для каманды – 71% валодання, 680 перадач пры 90% дакладнасці і мала забітых мячоў. У «Балонні» іх 42 за 29 тураў – у топ-4 Італіі, Англіі, Іспаніі і Германіі больш няма клубаў з такой нізкай рэзультатыўнасцю. Прычым рэалізацыя ў клуба цалкам нармальная – чаканых галоў (xG) у іх менш, 37,79.
«Сталь» Шкурына гуляе зусім не так, як «Балоння». Да яе сярэдніх 550 перадач за матч польскаму клубу вельмі далёка. Цяперашняя каманда беларуса валодае мячом у сярэднім 49,04% часу – гэта 11-е месца па польскай лізе. І гэта не толькі таму, што «Сталь» не наймацнейшая каманда чэмпіянату – напрыклад, у нядаўнім матчы з аўтсайдарам «Рухам» усё роўна было 49% валодання. А калі клуб Шкурына ўсё ж пераўзыходзіў супернікаў па паказчыках у атацы, форвард нярэдка «маўчаў». Стваралася ўражанне, што звычайны стыль «Сталі» з закідамі і контратакамі значна больш падыходзіць беларусу.
Увогуле, запатрабаваныя «Сталлю» 2,5 млн еўра за Шкурына «Балоння» можа заплаціць лёгка, але пытанне, ці добра падыходзіць гэты варыянт для самога гульца. Зрэшты, 9 лютага Мелец згуляў нетыповы для сябе дамінантны матч (перамога 2:1) супраць «Пушчы» – 73% валодання мячом, 639 пасоў з 85% дакладнасці, – а Шкурын развіў галявую камбінацыю і сам жа завяршыў яе (адзнака 3:08).
Як бы то нi было, перад любым пераходам трэба добра падумаць. Перад вачыма прыклад 23-гадовага Уладзіслава Марозава – найлепшы бамбардзір ЧБ-2023 зімой паехаў у «Ароку» з Д1 Партугаліі, дзе адразу было відаць, што канкурэнты па атацы вельмі моцныя. Пакуль Марозаў так і не згуляў за новы клуб, а апошнія матчы і ў заяўку не трапляе.
