«Калі заўзятары скінуцца, мы пакрыем усе даўгі». Бос «Шэфілд Уэнсдэй» спрабаваў арыгінальна вырашыць фінансавыя праблемы, але...

Тайскі бізнесмен і ўласнік англійскага футбольнага клуба «Шэфілд Уэнсдэй» Дэйфан Чансіры знайшоў арыгінальны спосаб вырашыць фінансавыя праблемы праекту. Ён прапанаваў фанатам скінуцца па 100 фунтаў (каля 390 беларускіх рублёў), а калі фінансавая сітуацыя палепшыцца - паабяцаў вярнуць грошы з працэнтамі.

«Калі б 20000 фанатаў далі нам па 100 фунтаў, то мы атрымалі б 2 млн. фунтаў. Гэтага хопіць, каб пакрыць даўгі. Гэта трэба зрабіць да 10 лістапада, інакш мы атрымаем бан на тры наступныя трансферныя акны», - сказаў Чансіры.

Даўгі клуба ўтварыліся праз нявыплату заробкаў гульцам і запазычанасцяў перад падатковай службай Вялікабрытаніі. За гэта на клуб наклалі трансферны бан. Сам уласнік «Шэфілда» перакананы, што дрэнны фінансавы стан клуба звязаны з сусветным эканамічным крызісам, які выкліканы наступствамі кавіда і ваенных канфліктаў.

Сваёй віны ў неэфектыўнай працы праекту бізнесмен не бачыць і лічыць, што папракаць і патрабаваць ягонага сыходу могуць толькі тыя, хто ўкладзецца ў клуб.

Вяртаючыся да ідэі Чансіры, варта адзначыць, што прэцэдэнты, калі фанаты ўдзельнічалі фінансава ў жыцці тых ці іншых клубаў, ужо здараліся. Заўзятары берлінскага «Уніяна» здавалі кроў, каб выратаваць каманду ад банкруцтва. Фанаты «Уімблдона» сабралі больш за 4 млн. фунтаў на будаўніцтва стадыёна. Але далей за ўсіх пайшлі фанаты «Лутана» - яны выкупілі акцыі афшорнай кампаніі-крэдытора, якой завінаваціўся іх клуб. Гэта дазволіла ўплываць на клубныя рашэнні і пасля нядоўгай барацьбы выправадзіць жахлівага ўласніка.

Сітуацыя ў «Шэфілдзе» падобная да «лутанскай»: фанаты вінавацяць ва ўсіх праблемах уласніка, наконт чаго нават ладзілі пратэсты, – так што ініцыятыва Чансіры не знайшла падтрымкі ў іх шэрагах.

У выніку бізнэсмэн самастойна знайшоў грошы і аплаціў даўгі «Шэфілда». Забарона на трансферы з каманды знятая.