Магуайр не заслужыў такога стаўлення ў «МЮ» – але сам ён чамусьці гэтага не разумее
Анана самасцвярджаецца за кошт Хары, яго хейцяць заўзятары, а трэнер прапануе сысці.
4-гадовая гісторыя Хары Магуайра ў «Манчэстэр Юнайтэд» дасягнула сваёй самай нізкай кропкі – 30-гадовы абаронца відавочна выпаў з ростэра трэнерскага штаба і пачаў атрымліваць канкрэтныя прапановы па трансферы.
Набыццё абаронцы цяжка назваць паспяховым для «МЮ» як у спартыўным плане, так і ў фінансавым. Клуб заплаціў за цэнтрбека 87 мільёнаў еўра, а ў выніку атрымаў значна менш выгады, чым чакалася.
Крытычнай сітуацыя стала летам: манкуніянцы не разлічваюць на Магуайра і хочуць прадаць яго, каб атрымаць сродкі на іншыя трансферы, а сам англічанін пры іншым развіцці падзей рызыкуе правесці ў запасе сезон перад Еўра-2024.
Галоўны трэнер зборнай Гарэт Саўтгейт публічна намякнуў на ўзнікненне праблемы: «Калі ён будзе па-за складам, то яму трэба прыняць рашэнне, ці хоча ён гуляць у іншым месцы. Найлепшыя хочуць гуляць у кожным матчы».
У нацыянальнай камандзе Магуайр доўгі час быў незаменны, але ў «МЮ» стабільна выступаў значна горш. Гэта стварыла імідж «ахвярнага казла» і героя мемаў, што справакавала насамрэч зусім неналежнае стаўленне.
Тэн Хаг паўтарыў свае паводзіны ў сітуацыі з Раналду – казаў пра важнасць Хары, але намагаўся пазбавіцца ад яго
Эрык тэн Хаг – чалавек, які змог хоць неяк сістэматызаваць унутраныя працэсы ў клубе.
І нават калі нідэрландзец ідзе на вымушаныя жорсткія меры – гэта ўспрымаецца з разуменнем, бо здаецца, што іншага выйсця няма.
За год знаходжання ў Англіі тэн Хаг выявіў адну са сваіх асаблівасцяў. Ён – сапраўдны палітык, які вырашае праблемы непублічна. Фактычна кажа адно, але дзейнічае па-іншаму. Гэта прасочвалася двойчы – з Крышціяну Раналду і цяпер з Магуайрам.
Для таго каб не ствараць дадатковы рэзананс у медыя і ціск унутры калектыву, на пытанні журналістаў Эрык адказваў у пазітыўнай манеры. Напрыклад, казаў, што верыць у Раналду – але потым працягваў трымаць яго на лаўцы запасных.
З Магуайрам паўтарылася падобная гісторыя. На працягу ўсяго мінулага сезона тэн Хаг падтрымліваў цэнтрбэка, але лета пачаў з супрацьлеглых канкрэтных дзеянняў – адабраў капітанскую павязку і даў дабро на продаж.
Спачатку трэнер у сваім стылі выдаваў камплементарныя каментарыi:
💬 «Мы паважаем Магуайра. Ён вельмі важны для каманды. У яго вялікі патэнцыял, таму ўпэўнены, што Хары будзе змагацца за месца ў складзе. Усё залежыць ад яго»
💬 «Я не маю нічога супраць Хары. Не скажу, што ён – не частка гэтага складу. Гэта вельмі добры абаронца, проста яму трэба праявіць сябе».
Аднак кардынальна змяніў тон размовы, калі пачаліся затрымкі і цяжкасці з трансферам у «Вэст Хэм»:
«Хары павінен змагацца за сваё месца. Ён можа быць першакласным абаронцам, ён найлепшы ў зборнай Англіі, чаму б яму не стаць найлепшым у нашым складзе? Але трэба даказаць гэта.
Калі Магуайр недастаткова ўпэўнены ў сабе, каб змагацца за сваё месца ў складзе, яму варта сысці».
Магчыма, такія «ўколы» з'яўляюцца вымушанымі крокамі для вырашэння стратэгічных пытанняў, але не надта правільнымі ў стаўленні да Хары.
Анана паспрабаваў самасцвердзіцца, накрычаўшы на Магуайра – і сутыкнуўся са справядлівай крытыкай
Становішчам Магуайра адразу вырашыў скарыстацца навічок «МЮ» Андрэ Анана. Знайсці іншыя тлумачэнні паводзінам галкіпера досыць складана.
У адным з матчаў ён паказальна накрычаў на больш дасведчанага партнёра пасля яго няўдалага дзеяння:
Анана сутыкнуўся са справядлівай крытыкай ад журналістаў і заўзятараў, якія трапна падкрэслівалі: «А ці зрабіў бы ён так пасля памылкі Варана ці Лісандра?».
Трапна выказаўся Габрыэль Агбанлахор:
«Перш за ўсё, Магуайр не зрабіў нічога дрэннага. Мне здаецца, ён проста стаў лёгкай мішэнню.
Мне не спадабаўся ўчынак Анана. Я зразумеў бы, калі б памылка была сур'ёзнай і прывяла да прапушчанага гола, ці калі б гэта адбылося па віне самога Хары. Але мне хацелася б бачыць роўнае стаўленне да ўсіх гульцоў».
Не найлепшы спосаб зарабіць аўтарытэт, хаця Андрэ потым апраўдваўся:
💬 «Хары добра гуляе з мячом, так што я б шмат чаго патрабаваў ад яго. Ён добры хлопец. У мяне з ім добрыя адносіны. Мы павінны быць вельмі самакрытычнымі».
Магуайр не пацягнуў узровень «МЮ» – але сваімі паводзінамі не заслужыў такога хейта фанатаў
Гэтая тэма далёка не новая. Пэўнага апагею хейт дасягнуў увосень, калі Магуайр, па розных дадзеных, займаўся індывідуальна з мэтай «перазагрузіцца» ў спакоі.
Гэтаму папярэднічала некалькі эпізодаў – у чэрвені ён атрымаў паведамленне з пагрозай, што ў яго доме нібыта закладзена выбухоўка, а заўзятары зборнай скандавалі крыўдныя крычалкі падчас матча Лігі нацый.
Тут трэба аддаць належнае мясцовым фанатам, бо на «Олд Трафард» гэтага не здаралася. Інцыдэнт паўтараўся летам у ЗША ў перадсезонным турнэ, у Аўстраліі, на «Уэмблі» або на іншых выязных стадыёнах Англіі.
Брытанскія СМІ ў ліпені апублікавалі інсайд, маўляў, Магуайр праводзіць па тры інтэнсіўныя індывідуальныя трэніроўкі ў дзень, у тым ліку з экс-абаронцам «Чэлсі» Рыкарда Карвалью, каб падрыхтавацца да сезону. Усё скончылася папрокамі, што гэта дрэнны падыход, таму што Хары грэбуе аднаўленнем паміж матчамі зборнай Англіі і стартам збораў «МЮ». Атрымлiваецца, гулец спрабуе даказаць сваю прафпрыдатнасць, а ў выніку атрымлівае чарговую порцыю крытыкі.
Магуайр трапіў у каманду, узровень якой не змог пацягнуць. Але ён быццам не разумее, у якім становішчы аказаўся. Калі «Вэст Хэм» дамовіўся пра яго пераход, Хары па незразумелых прычынах усё сарваў – патрабаваў кампенсацыю ў манкуніянцаў, з-за чаго здзелка была пастаўлена на паўзу, а «малатабойцы» ўжо паспелі знайсці замену ў выглядзе Канстанцінаса Маўрапанаса са «Штутгарта».
Гэта правал як клуба, так і самога футбаліста. Магуайр чамусьці закрывае вочы на ўсё, што робіцца вакол яго, і не жадае мірыцца з рэальнасцю: неапраўданая нянавісць фанатаў, адсутнасць веры тэн Хага і імклівае падзенне ў іерархіі каманды.
Хары – «старамодны» абаронца, якому банальна цяжка адаптавацца да патрабаванняў сучаснага футбола, які ў «МЮ» будуе Эрык з высокай лініяй абароны. А сярэднія і нізкія блокі, якія выкарыстоўвае Дэвід Моес у «Вэст Хэме», цалкам маглі б дапамагчы вярнуць упэўненасць і рэанімаваць кар’еру перад Еўра-2024.
Магуайр рызыкуе больш не атрымаць i такой прапановы, калі гэтым летам не разбярэцца са сваімі агентамі і не пакіне Манчэстэр.
Фота: IMAGO/Ricardo Larreina Amador, Sky Sports, Vincenzo Izzo/Shutterstock