Сяргей Алейнікаў: «Калі гляджу матчы чэмпіянату Беларусі, нават не магу паверыць, што гэта вышэйшая ліга»
Былы беларускі футбаліст Сяргей Алейнікаў у інтэрв'ю тэлеграм-каналу «О, спорт! Ты – мир!» падзяліўся меркаваннем пра чэмпіянат Беларусі па футболе.
– Вы кажаце, што да вас прыязджаюць сваякі і сябры. Што яны расказваюць пра Беларусь?
– Шмат чаго. Вядома, гэта не для прэсы, гэта асабістыя размовы, але няцяжка здагадацца, што нічога добрага не расказваюць. З кожным годам усё больш негатыву.
– Не прапануеце ім пераехаць у Італію?
– Скажам так, нават калі і заводзіцца гэтая тэма, я ўсё роўна лічу, што гэта рашэнне кожнага канкрэтнага чалавека, людзі самі павінны вырашаць – з'язджаць ім ці не. Усё ж такі шмат абставін, якія дазваляюць з'ехаць ці якія ўтрымліваюць. Заўсёды знойдзецца нейкае але.
Скажу так: усе чакаюць, калі можна будзе спакойна і нармальна жыць, калі можна будзе нешта ствараць. Увогуле людзі спадзяюцца на перамены, на нешта лепшае. Але каб было нешта добрае, над гэтым трэба працаваць, трэба прыкладаць нейкія намаганні, а не проста сядзець і чакаць. Вось вернемся да таго ж футбола.
Калі вы жадаеце зрабіць прадукт якасным, цікавым, так рабіце ўсё для гэтага, а не проста чагосьці чакайце. Шчыра, я калі гляджу матчы чэмпіянату Беларусі, нават не магу паверыць, што гэта найвышэйшая ліга.
– Вы ў Італіі глядзіце беларускую вышэйшую лігу?
– Канцоўку чэмпіянату ў гэтым сезоне глядзеў на YouTube, нейкія матчы. Зацікавіўся тым, як гуляе «Энергетык-БДУ», зірнуў канцоўку аднаго матчу на фінішы чэмпіянату. Але, сапраўды, калі ўбачыў увесь антураж, гэтую карцінку, не мог паверыць, што гэта сапраўды вышэйшая ліга. Значыць, такія рэаліі.
А яшчэ звярнуў увагу, што ў складзе «Энергетыка-БДУ» ёсць нядрэнныя хлопцы. Толькі вось мне незразумела да канца: па сваёй сутнасці яны – прафесійныя футбалісты ці «студэнты», якія гуляюць футбол? Да канца не разумею. Як бы лічацца прафесіяналамі? Вось ключавое тут - як бы, – сказаў Алейнікаў.
