МАК дазволіў мужчынам удзельнічаць у групавых спаборніцтвах па сінхронным плаванні на Алімпіядзе-2024
Прэзідэнт Міжнароднай федэрацыі плавання Хусэйн Аль-Мусалам паведаміў, што Міжнародны алімпійскі камітэт (МАК) дазволіў мужчынам удзельнічаць у групавых спаборніцтвах па сінхронным плаванні на Алімпійскіх гульнях-2024 у Парыжы.
«Гэта падзея азначае вяху ў гісторыі плавання. Эвалюцыя нашага віду спорту ў напрамку інклюзіўнасці ідзе хуткімі тэмпамі, і рашэнне МАК і World Aquatics дапаможа нам стаць прыкладам для ўсяго алімпійскага руху.
Мы гатовыя гучней, чым калі–небудзь, падзяліцца з усім светам алімпійскім дэвізам: «Хутчэй, вышэй, мацней - разам».
Водныя віды спорту ўніверсальныя, і мужчыны зарэкамендавалі сябе як выдатныя сінхронныя плыўцы.
Уключэнне мужчын - вялікая заслуга ўсіх, хто шмат гадоў працаваў над тым, каб гэта адбылося», – сказаў Аль-Мусалам.
Па новых правілах у склад каманды з 8 спартсменаў можна ўключаць максімум двух мужчын.
Прысутнасць мужчын у камандзе не будзе лічыцца абавязковым. Упершыню ў гісторыі мужчыны-сінхраністы змогуць выступіць на Алімпіядзе ў Парыжы.
Раней мужчыны маглі супернічаць толькі ў мікст-дуэтах, але гэтая дысцыпліна не ўваходзіла ў алімпійскую праграму.