Умар Крамлёў: «Будучыня бокса ў нашых руках. У IBA не павінна быць панікі ці прыгнечанага настрою»

Расійскі функцыянер Умар Крамлёў, які ўзначальвае Міжнародную баксёрскую асацыяцыю (IBA), адрэагаваў на выключэнне арганізацыі са складу Міжнароднага алімпійскага камітэта (МАК).

«На працягу алімпійскага цыклу будзе павялічана колькасць спаборніцтваў IBA, якія фармуюць нашых спартоўцаў і дазваляюць ім дасягаць сваіх найлепшых вынікаў і нават летуценняў. Калі не будзе IBA і яе комплекснай сістэмы спаборніцтваў, не будзе магчымасці развіваць нашых людзей.

У нас ёсць амбіцыйныя планы па павелічэнні прызавых фондаў. І каб зрабіць нашыя нацыянальныя федэрацыі больш устойлівымі і паспяховымі, мы будзем змагацца за тое, каб больш краін мелі магчымасць удзельнічаць і заваёўваць медалі на буйных спаборніцтвах.

IBA працягвае развіваць прафесійны бокс, што з'яўляецца выдатнай магчымасцю для нашых найлепшых спартсменаў пашырыць свае гарызонты ў спорце і, вядома, забяспечыць свае сем'і.

У нас шмат планаў на будучыню, і я запэўніваю вас, што нашыя баксёры і трэнеры будуць заставацца ў цэнтры ўвагі нашай арганізацыі. Мы працягваем прытрымлівацца нашай спартыўнай сумленнасці.

Жадаю запэўніць вас, што жыццё IBA і яе ўсіх нацыянальных федэрацый, а таксама спартсменаў, трэнераў і афіцыйных асоб працягваецца. Сярод нас не павінна быць панікі ці прыгнечанага настрою.

У гэты момант мы павінны быць адзіныя, як ніколі раней, і паказаць нашу непахісную адданасць боксу. Мы працягнем рабіць тое, што абяцалі, - праводзіць больш мерапрыемстваў і прызавых, а таксама даваць больш магчымасцяў для фінансавай падтрымкі, неабходнай для далейшага развіцця нашага віду спорту.

Я таксама хацеў бы падкрэсліць, што будучыня бокса ў нашых руках, і мы працягнем забяспечваць найлепшыя ўмовы для нашых спартсменаў», - сказаў Крамлёў.

Заўчора, 22 чэрвеня, выканаўчы камітэт МАК прыняў рашэнне выключыць IBA са свайго складу за невыкананне ўмоў.