Ліянель Месі: «Сёння даведаўся, што правёў 1000-ы матч у кар'еры – жыву момантам і атрымліваю асалоду ад таго, што мы зараз праходзім»

Капітан зборнай Аргенціны Ліянель Месі падзяліўся думкамі адносна перамогі над Аўстраліяй (2:1) у 1/8 фіналу чэмпіянату свету-2022.

«Мы кантралявалі гульню і загадзя маглі зняць усе пытанні. Акрамя апошняга сейва Марцінеса, у нас не было значных праблем.

Я вельмі рады, што мы выйгралі і зрабілі яшчэ адзін крок наперад. Часу на адпачынак было мала, і гэта выклікала асцярогу, бо меркавалася, што ў матчы будзе шмат барацьбы. Мы здолелі адкрыць лік, забіць другі мяч і ўзяць гульню пад кантроль. Сапернік таксама забіў і ўскладніў нам жыццё напрыканцы гульні, але гэта зразумела для чэмпіянату свету.

Пачуцці неверагодныя, класна дзяліць гэты момант з заўзятарамі. Ведаем, на што яны пайшлі дзеля таго, каб прыехаць сюды – іх энергетыка проста неверагодная.

Я сёння даведаўся, што правёў тысячны матч у кар'еры – жыву момантам і атрымліваю асалоду ад таго, што мы зараз праходзім, рады, што ўжо апынуліся ў чвэрцьфінале», – сказаў Месі.

⚽️ Чэмпіянат свету-2022 па-беларуску і без VPN! Пампуй дадатак Tribuna.com