Корзун пра памылкі гульцоў у Суперкубку: «Поле было цяжкім, мы ўпершыню гулялі новымі мячамі – вельмі слізкія»
Капітан «Шахцёра» Мікіта Корзун распавёў пра тое, чаму ў матчы за Суперкубак Беларусі футбалісты шмат памыляліся.
– Шчыра скажу, што на такім газоне вельмі складана было не толькі рабіць дакладныя перадачы, але і прымаць мяч. Не кажучы ўжо пра ягоны кантроль, пра абводку. Мы ўпершыню гулялі новымі мячамі, і не скажу, што з імі было лёгка зладзіцца. Вельмі слізкія. А калі па такім полі яшчэ і мяч рухаецца ў тры разы хутчэй, чым звычайна, то сапраўды ўзнікалі праблемы літаральна на роўным месцы. Кажу гэта не ў апраўданне кіксам ці нявымушаным памылкам, якія мелі месца ў матчы, а проста канстатую факт.
– Атрымліваецца, не тэхніка ў гульцоў дрэнная, а мячы?
– Безумоўна!
– Добра, з мячом усё зразумела. У другім тайме газон стаў яшчэ горшым?
– Не. На мой погляд, поле засталося такім жа цяжкім для гульні. А вось бачнасць пагоршылася, таму што снег валіў ужо шматкамі, – сказаў Корзун.